Compostela, 24 de novembro do 2018 – Loro (Silvio e os outros) é, sen dúbida, un dos filmes estelares do ano e estrease en Cineuropa. Sorprende, cando menos, que un filme destas características non pasara por ningún festival estatal con anterioridade.
Do caldo de cultivo conformado por Sorrentino, máis Berlusconi e o tremendo Toni Servillo xorde esta representación tan kitsch como certeira do ex primeiro ministro italiano nun reino da inmundicia a través dunha telenovela bárbara e casposa. A primeira das dúas citas que teremos con Silvio neste festival será este sábado ás 19:45 h. no Teatro Principal.
De seguido no mesmo Principal (ás 22:30 h.) dará comezo Galveston, da que Cineuropa celebra tamén a súa estrea estatal. A cuarta longa como directora de Mélanie Laurent é un filme de serie negra, adaptación dunha novela que Nick Pizzolatto escribiu antes de alcanzar a fama con True Detective. Galveston pertence á estirpe do noir que protagonizan seres crebados, dous perdedores que foxen da violencia e buscan último refuxio nunha Texas costeira e vítima dos furacáns. Cando xa sabemos que estes desvíos ao paraíso sempre terminan nun cul de sac. Entre a sordidez e a poética dese canellón das almas perdidas, hai que ver para crer a composición de fraxilidade exquisita de Elle Fanning.
Mais estes grandísimos filmes non serán as únicas novidades da xornada: este sábado da comezo unha interesante mostra de cinema con perspectiva feminista realizada en colaboración co Centro Simone de Beauvoir. Sé fermosa e cala, de Delphine Seyrig, será o filme encargado de abrir este programa de carácter gratuíto que se exhibirá os días 24 e 25 na Sala Mozart do Auditorio de Galicia. Co sexismo como fío condutor, o documental amosa unha serie de entrevistas feitas por Seyrig con vinte e tres actrices francesas, inglesas, americanas e unha canadense que evocan a súa experiencia profesional, os papeis que lles propuxeron e as súas relacións cos directores e equipos técnicos.
Ás 16:15 h. no Salón Teatro, dará comezo o primeiro pase de Míriam miente, de Natalia Cabral e Oriol Estrada, un retrato cativador dunha cultura, á vez que unha crónica íntima da adolescencia e unha feroz crítica dunha sociedade clasista, racista e fachendosa. Todo iso cun estilo próximo ao documental, onde sobresae un elenco de actores –tanto novos como adultos, algúns experimentados, outros non profesionais— dunha naturalidade abraiante. Ás 19:30 na mesma sala, comezará The kindergarten teacher, o segundo filme de Sara Colangelo polo que a cineasta obtivo o premio á mellor dirección en Sundance. Seguramente lembrará o espectador de Cineuropa un filme do mesmo título dirixido polo israelí Nadav Lapid proxectado neste festival en 2014. Aquela relación entre unha profesora e o seu alumno que con cinco anos se revelaba como un poeta de profundidade é inesquecible. Pois sobre aquela obra mestra filmou Sara Colangelo o seu remake, co visto e prace de Lapid. O resultado é máis que convincente: é quen de reter a tensión crecente que levaba xa a versión israelí do cinema con neno ao thriller irrespirable.
Por outra banda, convén salientar o último pase de Deslembro, de Flavia Castro, que vén de gañar o premio FIPRESCI da crítica, o premio do público e o premio á mellor actriz secuendaria no Festival de Río de Xaneiro. No filme, que se exhibirá no Teatro Principal ás 18 h. Castro vai debullando unha historia que se asemella a moitas pero que é tan singular como ningunha. Joanna é filla dun pai desparecido pola ditadura brasileira, e o desexilio, que se lle impón xusto na metade da súa adolescencia, conéctaa con ese pasado cuxa memoria foi borrada polo tempo, a imaxinación e a información fragmentada. Un relato de iniciación á vez poético e político, entrañable e necesario.
No cinema Numax ás 19:15 h. poderemos conversar de novo con Charlotte Serrand directora de 1048 lúas, que visita o festival para presentar este belísimo filme, unha revisión cinematográfica das Cartas das heroínas de Ovidio onde o visual e o sonoro se axustan ao relato magníficamente.
PROGRAMACIÓN CINEUROPA SÁBADO 24
TEATRO PRINCIPAL
16:00 MIRAI NO MIRAI / MIRAI, A MIÑA IRMÁ PEQUENA Mamoru Hosoda
18:00 DESLEMBRO Flavia Castro
19:45 LORO / SILVIO E OS OUTROS Paolo Sorrentino
22:30 GALVESTON Mélanie Laurent
SALÓN TEATRO
16:15 MIRIAM MIENTE Natalia Cabral e Oriol Estrada
18:00 L’HOMME FIDÈLE / UN HOME FIEL Louis Garrel
19:30 THE KINDERGARTEN TEACHER Sara Colangelo
21:30 LES ESTIVANTS / A CASA DE VERÁN Valeria Bruni Tedeschi
23:45 SAUVAGE Camille Vidal-Naquet
MULTICINES COMPOSTELA (SALA 2)
18:00 À L’AVENTURE* Jean-Claude Brisseau
20:00 ENTER THE VOID* Gaspar Noé
22:30 EMPEROR TOMATO KETCHUP* Shûji Terayama
CINEMA NUMAX
17:30 WHAT KEEPS YOU ALIVE Colin Minihan
19:15 1048 LUNES / 1048 LÚAS Charlotte Serrand, con presentación e coloquio.
20:30 L’EMPIRE DE LA PERFECTION / BUSCANDO A PERFECCIÓN Julien Faraut
22:15 ‘77 NO COMMERCIAL USE Luis Fulvio
SEDE AFUNDACIÓN
17:30 OCAÑA, RETRAT INTERMITENT* Ventura Pons
19:15 ROCÍO* Fernando Ruiz Vergara
SALA AGUSTÍN MAGÁN (CC. SANTA MARTA)
17:00 SHOAH (parte 1)* Claude Lanzmann
AUDITORIO DE GALICIA (SALA MOZART)
19:30 SOIS BELLE ET TAIS-TOI / SÉ FERMOSA E CALA* Delphine Seyrig
PROGRAMACIÓN CINEUROPA DOMINGO 25
TEATRO PRINCIPAL
15:30 DILILI À PARIS / DILILI EN PARÍS (2018) – Michel Ocelot
17:15 NEVER LOOK AWAY / OBRA SEN AUTOR (2018) – Florian Henckel von Donnersmarck
20:30 PREESTREA EN GALICIA. PRESENTACIÓN CO EQUIPO DA PELÍCULA HAMADA (2018)– Eloy Domínguez Serén
22:30 THE MAN WHO SURPRISED EVERYONE / O HOME QUE SORPRENDEU A TODOS (2018) – Natalya Merkulova,Aleksey Chupov
SALÓN TEATRO
16:30 LAS HEREDERAS (2018) – Marcelo Martinessi
18:15 SUPPORT THE GIRLS (2018) – Andrew Bujalski
20:00 GALVESTON (2018 – Mélanie Laurent
21:45 LA CENA BLANCA DE ROMINA (2017) – Francisco Rizzi,Hernán Martín
23:00 LONG DAY’S JOURNEY INTO NIGHT / LONGA VIAXE DO DÍA CARA Á NOITE (2018) – Bi Gan
MULTICINES COMPOSTELA (SALA 2)
17:30 JIMMIE (2018) – Jesper Ganslandt
19:15 MIRIAM MIENTE (2018) – Natalia Cabral,Oriol Estrada
21:00 KARDEŞLER / IRMÁNS (2018 – Ömür Atay
22:45 FISCHIA IL SESSO (1974) – Gian Luigi Polidoro
CINEMA NUMAX
17:30 PRESENTACIÓN E DEBATE CUNA DE MÚSICOS (2018) – Pablo Vázquez e Denis Carballás
19:00 TEMPO COMUM (2018 – Susana Nobre
20:15 PRIMAS (2017 – Laura Bari
22:15 DIANE (2018) – Kent Jones
SEDE AFUNDACIÓN
17:00 CHOSES SECRÈTES / PAIXÓNS SEGREDAS (2002) – Jean-Claude Brisseau
19:00 THE BRIDES OF DRACULA / AS NOIVAS DE DRÁCULA (1960) – Terence Fisher
SALA AGUSTÍN MAGÁN (CC SANTA MARTA)
16:30 SHOAH (parte 2) (1985) – Claude Lanzmann
AUDITORIO DE GALICIA / SALA MOZART
18:45 MASO ET MISO VONT EN BATEAU / MASO E MISO VAN EN BARCO (1975) – Carole Roussopoulos,Ioana Wieder,Delphine Seyrig,Nadja Ringart
20:00 LA MARCHE DES FEMMES À HENDAYE / A MARCHA DAS MULLERES A HENDAIA (1975), + LIP: MONIQUE ET CHRISTIANE (1976) + VIOL CONJUGAL, VIOL À DOMICILE / VIOLACIÓN CONXUGAL, VIOLACIÓN A DOMICILIO (2003) – Ioana Wieder e Carole Roussopoulos, Carole Roussopoulos, e Carole Roussopoulos e Véronique Ducret respectivamente
Nota: as películas marcadas cun asterisco son de entrada libre.