Ames, 5 de outubro do 2018 – O acordo de orzamentos acadado entre Ames Novo e o goberno municipal parece ter as horas contadas xa que o tripartito quere destinar máis de 200.000 euros de superávit sen consensuar coa iniciativa cidadá.
O acordo de orzamento, acadado no mes de marzo, comprometía ao goberno de Ames (Psoe, BNG e Contigo Pódese) a consensuar os remanentes de tesourería procedentes do exercicio 2017. Este diñeiro e consecuencia do acordo entre a Federación de Municipios e Provincias e o Ministro Montoro que habilitaba aos concellos para gastar parte dos cartos sobrantes de exercicios anteriores. No caso de Ames supón 214.000 euros que o goberno municipal levará a un pleno extraordinario para que sexan incorporados ao orzamento de este ano.
Ames Novo denuncia que esa incorporación de remanentes xa estaba contemplada no acordo e sería considerada para dos orzamentos negociados. Para o portavoz da iniciativa e candidato a alcaldía Quique Costas “Que esta incorporación de crédito e a asignación de en que vai ser empregado se fixera de xeito unilateral, sen consulta algunha, séndonos trasladado unha vez que xa estaba asignado, é unha violación flagrante dun acordo básico e así llo transmitimos ao goberno. Pola nosa parte fomos absolutamente leais e consecuentes co pactado e nos parece inaceptable que a outra parte incumprise un dos acordos explícitos asinados no seu día no pacto que levou á aprobación das contas, o que nos sitúa nun escenario que dificulta, sen dúbida, o entendemento futuro co goberno local”.
Para Ames Novo non se trata só do reparto unilateral xa que tampouco están de acordo con que tódolos cartos se destinen a obras “A norma establece unha serie de partidas ás que se pode destinar este diñeiro e, de terse consensuado connosco, a súa utilización ía estar, desde logo, máis diversificada” explica Quique Costas que considera que esta actitude demostra que “unha vez máis o goberno parece ter perdido a perspectiva da súa situación de minoría, actuando como se tivesen maioría absoluta.
Nunca foi nin será a nosa unha estratexia de bloqueo, como a que parece seguir a dereita municipal, na que paguen as consecuencias as veciñas e veciños de Ames, pero o goberno ten que ser consciente de que na súa
situación de debilidade só poden sacar as cousas adiante se buscan o apoio de outras forzas da Corporación e isto só é posible mediante o establecemento de consensos sobre os temas. Non parece, xa que logo, o incumprimento dos pactos asinados a mellor estratexia para acadalo”.