Compostela, 1 de agosto do 2018 – O debate sobre a ordenanza de terrazas e os cambios introducidos en Compostela continúa xirando en torno ao espazo de fachada que ocupan.
A asemblea que a Asociación de Hostalería mantiña na tarde de este martes acordaba iniciar unha campaña en defensa do servizo de terrazas. A Asociación lembra nun comunicado que a aprobación da normativa foi posible grazas a abstención do Psoe e o BNG que puxeron como condición a que se iniciase un diálogo co sector e denuncian que aínda non se produciu dito encontro.
Os hostaleiros consideran que de todos xeitos é o momento de iniciar unha campaña de defensa dos seus dereitos e para iso na reunión de onte creouse unha comisión de traballo. O sector explica ademais que este non é un problema real e para comprobalo ten solicitado ao Concello un informe sobre o número de prazas de terrazas que hai na cidade e sobre cantas non se axustan á fachada do local. Este é un dos puntos que xera máis preocupación xa que a nova Ordenanza indica que estas deben ocupar só ese espazo. A Asociación segue mostrando a súa disposición ao diálogo pero lembra que as terrazas son un servizo demandado pola cidadanía.