Juan Viaño presenta o seu equipo pensando na transformación dixital da USC

1

Compostela, 11 de abril do 2018 – Juan Viaño presentou o seu programa electoral e ao equipo que o acompaña na súa candidatura. Co lema Somos USC. Somos Dixitais o actual reitor presenta un programa pensado na transformación dixital da USC.

Juan Viaño destacou no acto que é a primeira vez na historia da USC na que se presenta unha candidatura formada maioritariamente por mulleres. Viaño estivo acompañado de todos os membros do seu equipo, formado por seis mulleres e cinco homes. ”Presentámonos cun equipo que contribúe a rachar co teito de cristal co que se atopan as mulleres no seu desenvolvemento profesional. Cremos no talento e na profesionalidade das mulleres e agora demostrámolo”, afirmou Viaño.

O programa está formado por dúas partes diferenciadas. Nunha primeira parte, analízase e actualízase a misión e a visión da USC como universidade pública de calidade. Explícase o novo enfoque na oferta formativa, na investigación, na transferencia e na internacionalización. No documento defínese tamén a responsabilidade que debe asumir a USC, especialmente nos aspectos económicos e “garantir a solvencia suficiente para poder acometer a transformación que require a USC”, afirmou Viaño. Do mesmo xeito, no programa electoral defínese con detalle a función que debe asumir a USC como motor da economía e da sociedade local das cidades de Santiago de Compostela e de Lugo. O candidato definiu as principais accións dentro da oferta formativa, especialmente no pulo que se lle deben dar aos dobres graos e nos plans de formación transversal nas Escolas de doutoramento internacional. No ámbito da investigación e da transferencia, Viaño aposta pola implantación das metodoloxías aportadas polo selo de excelencia HRS4R, recentemente concedido á USC, así como mecanismos de mentorización e programas específicos de captación de talento investigador.

Na segunda parte do programa analízanse as transformacións que debe acometer a USC para afrontar con éxito o futuro e seguir sendo unha referencia. Defende un modelo diferente de xestión das persoas, tanto dos estudantes coma dos PAS e o PDI, con especial atención aos programas de atracción de talento, consolidación e promoción, un aspecto reforzado pola recente autorización da Xunta de Galicia para poder convocar 200 prazas de promoción de PDI nos vindeiros catro anos. “Esa autorización é froito da negociación coa Xunta e de ser capaces de demostrar a nosa responsabilidade por sacar á USC dunha situación económica moi difícil”, dixo Viaño.

Outros aspectos nos que incide a transformación son a reforma da organización da USC e unha adaptación da cultura institucional para atender adecuadamente as necesidades da Sociedade Dixital. “A USC sabe adaptarse aos cambios porque o leva facendo máis de 500 anos, e agora é o momento de asumir un novo xeito de facer as cousas”, afirmou Viaño.

O equipo

Viaño confesou que lle resultaba especialmente emocionante presentar a un equipo formado maioritariamente por mulleres nun edificio que leva o nome das dúas primeiras estudantes da Universidade de Santiago de Compostela, Elisa e Jimena Fernández de la Vega.

O candidato tamén afirmou que outra das características importantes do equipo, ademais do talento e da profesionalidade, é o cambio xeracional. “Combinamos a experiencia de persoas que xa o demostraron todo na súa carreira científica e investigadora coa mocidade achegada por candidatas que, pese a non superar a década dos corenta, lograron demostrar claramente a súa valía profesional. Entre todos e todas, formamos un equipo capaz de guiar o futuro da institución nos vindeiros catro anos”, afirmou.

O equipo está formado por:

– Luis Lima: Organización Académica e PDI

– José Manuel Cotos: Investigación e Transferencia

– Isabel Diz: Oferta Formativa

– Rosa Crujeiras: Planificación e Coordinación

– María José Carreira: Transformación Dixital

– Almudena Hospido: Internacionalización e Cooperación

– Loreto Fernández: Estudantes e Empregabilidade

– Javier Bueno: Coordinación do Campus de Lugo

– Andrés Barreiro: Ciencia e Innovación no Campus de Lugo

– Consuelo Ferreiro: Secretaría Xeral

Ademais deste equipo, incorporaranse dous delegados do reitor para os temas relacionados co ensino medio e coa cultura, patrimonio e mecenado. Estas persoas son:

– Luis M. Hervella. Delegado do reitor para o ensino medio

– José Manuel García Iglesias. Delegado do reitor para cultura, patrimonio e mecenado.

Share.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies