A Estrada, 18 de febreiro do 2019 – O BNG da Estrada ven de anunciar que levará ata o Parlamento Europeo o “despilfarro” da remodelación da Alameda.
Os nacionalistas manteñen desde hai tempo unha actitude moi crítica sobre o proxecto EDUSI que supón cinco millóns de euros de Fondos Feder. O BNG lembra que a participación é un dos piares de este tipo de iniciativas que teñen como obxectivo final o desenvolvemento cultural e natural das áreas urbanas. Para o grupo a obra da Alameda, financiada con estes fondos, non pode ser considerada sustentable nin medio ambiental cando foron cortados árbores centenarios e non se dan solucións de minimicen o impacto enerxético nin na construción ni no mantemento posterior.
Falta de participación
O BNG denuncia tamén a falta de participación. Según explican “hai que ter en conta que organizacións políticas e sociais fixeron propostas, -o BNG entre elas- que nunca se chegaron a avaliar nin a considerar por parte da comisión xestora da EDUSI. Neste sentido, cómpre engadir que foi o propio alcalde o que recoñeceu publicamente que a ampliación da Alameda “non é unha proposta do PP; é unha proposta dun equipo, dunha enxeñería, que gañou un concurso e que se adapta ás necesidades da Estrada e á estratexia EDUSI”.
A eurodeputada Ana Miranda den de impulsar unha iniciativa para coñecer como se gastan os millóns de euros dos fondos FEDER da Unión Europea. No BNG explican que “non é de recibo que o grupo municipal do PP gaste un millón e medio de euros dos fundos EDUSI nunha actuación non prioritaria nestes intres habendo como hai outras prioridades e necesidades que padecen no día a día veciños e veciñas da Estrada. Entre elas subliñamos unha vez máis os problemas crónicos da traída de auga que padece a vila ou o saneamento do rural”.
O BNG presentou ademais 45 propostas no mes de xaneiro de 2017 que nunca se chegaron a debater ao longo destes meses en ningún foro “a pesar da tan cacareada participación cidadá que nos vende o PP”. As propostas ian desde a creación de aparcadoiros públicos gratuítos en superficie en distintos puntos da vila como demanda tamén o colectivo de comerciantes, ou a apertura de novas rúas, até a potenciación da praza de abastos, recuperar os sistemas de regadío existentes actualmente inutilizados para que sirvan para afrontar as secas dos últimos veráns ou a posta en marcha do matadoiro municipal.