Lousame aproba o convenio colectivo do persoal laboral

0

Lousame, 27 de maio do 2019 – O pleno municipal de Lousame aprobou o convenio colectivo do persoal laboral do Concello que os equipara en dereitos cos funcionarios. A aprobación realizouse cos seis votos a favor do Grupo de Goberno, xa que os dous concelleiros do PSOE abandonaron a sesión sen votar a proposta.

A alcaldesa de Lousame, Teresa Villaverde, explicou que este convenio colectivo “o que fai é equiparar os dereitos dos traballadores laborais cos funcionarios. Equiparar. Se cando houbo baixada de salario se lles baixou a todos por igual, entón tamén os dereitos debes ser para todos por igual”. Ademais, adiantou que “saia quen saia nas eleccións, dende o primeiro día hai que empezar co convenio dos funcionarios e despois afrontar a RPT, que non é unha tarefa sinxela”.

Negociación

Villaverde xustificou a urxencia do pleno extraordinario en que “é prioritario acelerar a aprobación para que entre en vigor o máis axiña posible”, pois agora será presentado para o seu rexistro e publicación no BOP. Villaverde explicou que “desde o inicio desta lexislatura se amosou un interese máximo en aprobar este convenio”, se ben foi en agosto de 2017 cando os traballadores presentaron o primeiro borrador de convenio.

O 18 de febreiro de 2018 tivo lugar a primeira reunión da mesa de negociación, onde se recoñeceron os trienios do persoal laboral e se asumiron dende o 1 de xaneiro. O 16 de maio de 2019, os servizos técnicos municipais de Lousame remataron o informe da proposta dos traballadores, que foi enviada aos delegados sindicais. O 22 de maio de 2019 celebrouse unha nova mesa de negociación e convocouse a sesión plenaria de hoxe.

Villaverde tamén lembrou que “no pleno ordinario de maio dixen que posiblemente convocaría un pleno extraordinario para aprobar este convenio, que é unha débeda que tiña co persoal laboral dende o primeiro día da lexislatura. Non é algo que se fixera nuns días, é un traballo de 4 anos”.

“Rechina”

O voceiro socialista, Julio Paradela, criticou “tanta dilación de tempo” na aprobación do convenio e “que agora, en plena campaña nos convoque a un pleno. Cando menos rechina un pouco, máximo cando se nos entregou un documento e pretenden que en dous días repasemos todo”. Diante desta situación, Paradela propuxo “deixar isto enriba da mesa e, na próxima lexislatura, saia quen saia, no primeiro pleno se leve a cabo”.

Villaverde lembrou que “o tempo desta lexislatura remata mañá. E nós sentimos que vostede cambie unha letra das súas siglas, como é o O, pola P, que o O de Obreiro a subyugue agora mesmo ao Partido para non aprobar este convenio”. Pola contra, considerou que “deberíamos felicitarnos de traer este convenio e aprobalo conxuntamente porque é o que necesitan os traballadores”.

Paradela replicou que “non é un nin dous traballadores os que din que non teñen coñecemento do que se firmou, porque se firmou a presas e correndo”. Ao que Villaverde respondeu que “o sistema é representativo e os traballadores teñen tres delegados sindicais que elixiron eles”. Ademais, lembrou que “houbo un tempo de alegacións moi amplo e non se presentou ningunha” e que “a mesa de negociación do 22 de maio podía aprobar ou rexeitar o texto, e decidiu aprobalo”.

Abandono da sesión

Neste punto, a secretaria municipal puntualizou que o acordo ten vixencia ata o 31 de decembro do 2019, data na que os traballadores deberán decidir se se prorroga ou se desestima. Ante a convocatoria da votación do punto, os dous concelleiros socialistas levantáronse e abandonaron o pleno xa que “non imos entrar na dinámica de votarlle isto”.

Pola súa banda, os seis concelleiros do grupo de Goberno aprobaron o punto e a alcaldesa de Lousame deu por rematado o pleno asegurando que “é unha pena que nun tema tan importante como recoñecer os dereitos dos traballadores e aprobar un convenio colectivo, se utilice para facer o que xa supoñía que ía suceder por ser as datas que son. Nós non estamos facendo campaña, estamos aprobando un compromiso adquirido dende o principio da lexislatura”.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial