Ordes, 8 de febreiro do 2018 – O programa de servizos sociais básicos e o CIM, centro de información da muller prestado pola Mancomunidade de Ordes manterase no 2018.
O pleno da Mancomunidade celebrado esta semana aprobou a solicitude de subvención para o presente exercicio. A contía ascende a preto de 96.000 euros a cargo da Deputación da Coruña que irán destinados a sufragar o programa de axuda a domicilio baixo a fórmula de libre concorrencia para os concellos de Frades (34.000 €) e Ordes (62.000 €). Como novidade o Concello de Frades contará cunha nova auxiliar administrativa, mentres que o de Ordes seguirá cunha educadora social e unha auxiliar administrativa.
Outro dos puntos acordados foi a continuidade CIM. Con este fin presentarase a solicitude por algo máis de 110.000 € para a continuidade do cadro profesional composto por unha directora, unha axente de igualdade, unha psicóloga e unha asesora xurídica. Unha cantidade na que ademais van incluídos os custos para o deseño dun programa de prevención e tratamento integral da violencia de xénero. Segundo as últimas estatísticas o número de persoas atendidas ao longo do último ano achegouse ás 400, das cales 283 solicitaron o dito servizo por primeira vez en Ordes.
Por último tamén se acordou a solicitude para a contratación dun técnico ou técnica de xestión cultural para os concellos de Frades, Oroso, Tordoia e Trazo. O importe neste caso ascende a 15.000 € por parte da Deputación da Coruña a través de subvención.