Melide, 18 de setembro do 2019 – O alcalde de Melide, Xosé Manuel Pérez, e o primeiro tenente de alcalde, Xosé Antonio Prado, definiron nunha reunión as prioridades do mandato en canto a urbanismo.
Unha desas prioridades no campo do urbanismo é o chamado “feismo”. Poñer fin ás construcións sen rematar, as mal conservadas ou as que están en estado de abandono, serán das primeiras actuacións que se levará a cabo dende. Para acabar con estes feitos será necesario, tal e como apuntan dende o ente local “elaborar un inventario e posteriormente emitir as medidas executivas orientadas ao remate e a boa conservación das construcións. É necesario rematar co feísmo que producen estas construcións para a vila, proxectando sobre ela unha imaxe de abandono e un posible risco na seguridade da veciñanza”.
Actualización do PXOM
Alcalde e tenente de alcalde sinalaron a necesidade de actualizar o Plan Xeral de Ordenación Municipal (PXOM), e afirman que “o novo equipo de goberno ten que tomar a iniciativa neste ámbito, xa que non nos beneficia que teñamos que rexernos por unhas normas subsidiarias do ano 1994, temos que ser capaces de dar resposta ás necesidades de ordenación e desenvolvemento dunha vila como é Melide”.
O Concello estudará cal é o mellor xeito de ter unha normativa urbanística actual e para iso, basearase nos informes técnicos municipais para buscar a opción máis axeitada: ben volver a iniciar unha adxudicación para a nova redacción do PXOM ou continuar co proceso iniciado o 17 de novembro de 2004, paralizado nos últimos 8 anos, e no que se levan investidos 144.617,60 euros en pagos ao equipo redactor. O custo total de de gasto no plan inconcluso é de 243.739,20 €.
“A redacción iniciada no ano 2004 tería que ter rematado a finais do ano 2013 pero a falta de vontade política de anteriores gobernos, fai que hoxe Melide non teña un PXOM actualizado cos prexuízos que elo implica. É unha norma básica e fundamental para que a vila medre, Melide leva perdido dúas lexislaturas dende o 2011 en materia de urbanismo pola falta de interés dos seus políticos”, conclúe José Antonio Prado, primeiro tenente de Alcalde do Concello de Melide.
