Melide, 21 de febreiro do 2019 – O Concello de Melide aprobou en Pleno solicitar a Sogama a bonificación do canon de recollida pola taxa de lixo.
Esta baixada na taxa de lixo supón unha bonificación do 10%, que repercutirá positivamente en todos os fogares melidenses, traducíndose en que os veciños e veciñas e empresas locais terán que pagar menos cartos en 2019.
O Concello de Melide comprométese a reducir a produción de residuos e a incrementar a reciclaxe de envases lixeiros, en plena sintonía coas directrices da Unión Europea na materia, e ademais, trasladará esta rebaixa económica aos fogares. A esta medida, tamén se lle suman outras postas en marcha polo equipo de goberno local como o programa Horeca, dirixido á reciclaxe de vidro nos diferentes locais da hostalería, campañas de concienciación entre a veciñanza ou a instalación de novos puntos de recollida de lixo tanto no casco urbano como no rural, ofrecéndolles todas as facilidades para poder reciclar a diario.
A alcaldesa de Melide, Dalia García, apuntaba que “se todos participamos nunha pegada equilibrada no mediambiente, separamos mellor, reciclamos mellor e poñemos máis medios para poder facer que isto sexa posible, repercutirá sempre positivamente tanto na facenda local que é de todos como tamén no peto de cada un de nós”.
