Compostela, 1 de outubro do 2018 – Magnífico arranque de tempada do Monbus Obradoiro, gañando o partido ante o san Pablo Burgos na caldeira do Sar.
Un intenso partido no que o Obradoiro tivo que traballar en todo momento en equipo para poder derrotar ao Burgos de Diego Epifanio. Varios xogadores fóronse dando a testemuña durante toda a noite, emerxendo en diferentes momentos da contenda. Pero o fío condutor foi Nacho Llovet, sempre presente, intenso en defensa sobre Deon Thompson e descarado en ataque. O catalán acabou con 18 puntos e catro rebotes para 24 de valoración. O xogador máis destacado no Fontes do Sar.
Para o Monbus Obradoiro foi clave a interpretación de xogo de Pepe Pozas nos primeiros compases, habilitando a Hlinason, Llovet, de Zeeuw e Brodziansky en repetidas ocasións. O base malacitano foise ata as seis asistencias, nutrindo de balóns ás torres obradoiristas.
O Monbus Obradoiro comezou triunfal e afrontará con moral renovada o seu dobre compromiso canario: o xoves contra o Herbalife Gran Canaria (20:30) e o sábado contra o Iberostar Tenerife (20:30).