Compostela, 28 de marzo do 2022 – O Museo do Pobo Galego abre hoxe a XVII edición da Mostra Internacional de Cinema Etnográfico, a MICE.
O Teatro Principal acollerá a proxección de Cadernas de Olloboi, a primeira peza de esta edición da MICE. Trátase dun traballo feito por adolescentes desde as escolas e que se proxectará a partir das oito da tarde.
Olloboi é un festival audiovisual de curtametraxes dirixido a todos os niveis educativos. Organízao desde o 2009 unha asociación sen ánimo de lucro radicada en Boiro. Para este festival é imprescindible a colaboración da veciñanza, das e dos cineastas galegos, do Concello de Boiro e da Deputación da Coruña. No 2020 a Academia Galega do Audiovisual outorgoulle o Premio especial Xosé Sellier.
As curtas de Olloboi poderán verse durante o propio festival , dentro da programación de MICE Petís para as escolas, ata o venres 1 en dúas sesións matinais, ás 11 e ás 12h30, no Museo do Pobo Galego.
A partir de hoxe e ata final de curso, as curtas poderán verse tamén nos centros educativos, a través dunha ligazón e previa inscrición no enderezo servizosdeac@museodopobo.gal ou chamando ao 981 58 36 20. Deste xeito, o profesorado poderá programar a MICE Petís nos propios centros.
Presenza nos centros socioculturais
O festival tamén ofrece unha proposta para que a xente máis nova e maiores da casa traballen conxuntamente no hábito de ver cinema. A selección de curtametraxes de Olloboi achegarase a fin de semana do festival aos Centros socioculturais de Santiago de Compostela:
Centro Sociocultural Aurelio Aguirre de Conxo ·
Venres 1 de abril ás 20 h. Duración da proxección 50 minutos.
Centro Sociocultural Agustín Bueno do Castiñeiriño.
Sábado 2 de abril ás 18 h. Duración dá proxección 50 minutos.
Sección oficial da MICE
A partir de mañá, martes 29, xa se poderán ver os filmes das seccións oficiais, así coma das seccións Lindes, Trazas e Impropias. Talleres e mesas redondas e seminarios completan a programación desta 17 edición.
As entradas para as proxeccións son de balde e os talleres requiren inscrición en mice@museodopobo.gal.
Toda a programación e máis información na web do MICE