Melide, 20 de outubro do 2018 – O Conselleiro de Sanidade, Jesús Vázquez, e alcaldesa de Melide, Dalia García, presentaron o proxecto do novo centro de saúde de Melide nos terreos no que se construirá.
O novo edificio ten asignado un investimento de dous millóns de euros e a construción podería comezar antes de seis meses. O novo centro de saúde construirase nunha parcela cedida polo Concello de Melide de 4.968,50 m2, moi próxima ao edificio actual. A capacidade aumenta nun 60,69% xa que a superficie construída chegará aos 1.928,20 m2 fronte aos 1.200 m2 actuais.
Edificio en planta baixa para garantir a accesibilidade
O novo edificio conta cun deseño cunha única planta para favorecer a accesibilidade a todos os seus puntos. Estará estruturado en catro áreas diferenciadas: a de medicina xeral e servizos comúns; a de pediatría; a de fisioterapia e o Punto de Atención Continuada (PAC). O plan funcional do futuro centro de saúde melidense contempla 5 consultas de medicina de familia e 5 de enfermería, 1 de pediatría e 1 de enfermería pediátrica, 1 sala de toma de mostras, 1 consulta de farmacia, 1 consulta de matrona, sala de educación sanitaria, consulta de odontólogo e de hixienista e unha zona de fisioterapia que conta cunha ampla sala para ximnasio, ademais da consulta, cabinas de tratamento e sala de espera. Asemade contará con esperas, sala de xuntas, e estar do persoal, aseos, recepción, arquivos, almacéns, entre outros espazos. Finalmente, o PAC disporá dunha consulta de medicina e unha consulta de enfermería, sala de reanimación-observación, recepción, aseos, vestiarios, esperas, tres dormitorios e sala de estar do persoal.
O concello de Melide ten, na actualidade, 7.025 tarxetas sanitarias, das que 798 son pacientes en idade pediátrica. Mentres que as Urxencias Extrahospitalarias dan cobertura a 9.600 pacientes dos concellos de Melide, Toques e Santiso, sendo a media diaria de 26 atencións.
A construción deste no novo centro de saúde suporá que tanto os profesionais como os usuarios dispoñan dunha infraestrutura moderna e adaptada as súas necesidades, dando unha mellor resposta a atención sanitaria da cidadanía do concello de Melide e da súa contorna.