Melide, 13 de xullo do 2019 – De novo, o Concello de Melide foi alertado dun vertido, procedente dos residuos das empresas afincadas no actual polígono industrial situado na Madanela.
José Manuel Pérez e José Antonio Prado, alcalde e primeiro tenente do Concello, acompañados polo concelleiro de Medio Rural, Xosé Igrexas, desprazáronse ata o cauce do Furelos para comprobar in situ unha realidade que se repite no tempo: un novo vertido de residuos chega ao Furelos dende o seu afluente Rego de Piñor.
Diferentes forzas de seguridade ambiental, avisados pola dirección de Augas de Galicia, tales como o Seprona ou a policía autonómica, así como fontes da policía local e parte do equipo de goberno melidense achegáronse ata o lugar dos feitos onde puideron ver como o río volve presentar síntomas elevados de contaminación procedentes por residuos externos, procedentes dende o polígono da localidade.
O goberno local apunta que “os vertidos ao río Furelos procedentes do polígono industrial non é nada novo, de feito xa se deu unha situación idéntica hai uns meses. O problema endémico pola falta de saneamento na zona industrial de Melide continua sendo un dos principais problemas para a vila. Somos plenamente conscientes da magnitude deste problema para Melide, e é unha prioridade deste goberno poñer solucións a estes feitos e tomaremos todas as medidas necesarias para que así sexa. Estamos recabando toda a información que consta no Concello e nas autoridades competentes para poder ter claro cal é o camiño a seguir para rematar dunha vez por todas con este feito tan intolerable que levan sufrindo o noso medio ambiente dende hai anos”.