Compostela, 28 de febreiro do 2019 – O Museo do Pobo Galego celebra hoxe xoves unha nova palestra sobre o Entroido en Galicia, si na anterior edición falouse da historia e da recuperación do Entroido de Arcos (Mazaricos) hoxe tócalle a quenda as máscaras, os sermóns e alimentación.
A cita coa historia do Entroido comeza as sete e media da tarde. Partindo dos traballos de Antonio Fraguas, homenaxeado este ano no Día das Letras Galegas, a antropóloga Paula Godinho e o etnógrafo Xosé Manuel González Reboredo falarán de máscaras, momadas, sermóns e da importancia da alimentación nas celebracións entroideiras de Galicia.
O Museo do Pobo Galego comezou este ciclo de palestras en 2013 procurando amosar a riqueza e diversidade do Entroido a través de diferentes exemplos de recuperación de máscaras e da reflexión académica en torno a esta festa. Nestes sete anos achegáronse ao Museo, entre outros, os Merdeiros de Vigo, os Volantes do Entroido Ribeirao de Chantada, as Madamas e Galáns de Meira (Moaña), as bonitas de Sande ou o Entroido de Arcos (Mazaricos). Máscaras, que grazas ao pulo de colectivos e asociacións cívicas, volven saír as rúas.
A entrada é de balde ate completar aforo. Esta actividade conta coa colaboración do Concello de Santiago de Compostela.
Paula Godinho
Antropóloga e profesora asociada no Departamento de Antropoloxía da Facultade de Ciencias Sociais e Humanas da Universidade Nova de Lisboa. Investigadora do Instituto de Historia Contemporánea. Realizou e realiza o seu traballo de campo en Portugal, na raia e en Galicia. Os temas que nos que centra as súas investigacións son amplos e variados: usos políticos da memoria e prácticas patrimoniais, turistificación e mercantilización da cultura, topografía do poder, culturas fronteirizas e nacionalismo da diáspora, resistencia e movementos sociais, festivos e rituais.
Xosé Manuel González Reboredo
Etnográfo. Licenciado en Filosofía e Letras pola Universidade de Santiago. Especializouse en prehistoria e en etnografía galega. É colaborador e membro do padroado do Museo do Pobo Galego e membro da sección de Antropoloxía Cultural do Consello da Cultura Galega.
