O novo de Érick Zonca e Bruno Dumont pasa por Cineuropa

0

Compostela, 26 de novembro do 2018 – Este luns exhibiranse os últimos traballos de vellos coñecidos de Cineuropa como son os cineastas Érick Zonca e Bruno Dumont.

Érick Zonca roubounos a alma hai vinte edicións con A vida soñada dos anxos. O seu novo traballo, Fleuve noir, que poderemos ver no Salón Teatro ás 20:15 h., é un filme negro colosal e nihilista, dos que marcan. Pola súa banda, Bruno Dumont volve a Cineuropa con outro dos seus filmes aloucados e surrealistas, como se fosen eternas celebracións cinematográficas. Trátase nesta ocasión do fascinante Coincoin contra os extraterrestres, que se pasará no cinema Numax ás 20:45 h. No mesmo Numax ás 17:30 h. poderán asistir ao primeiro pase dunha das máis fermosas películas do ano: Wiñaypacha (Eternidade), filme que o director peruano Oscar Catacora rodou en idioma aimará. Un cinema que captura o ser humano sen artificios: a ambición de Rossellini e que semella autoimpoñerse Catacora, logrando, fiel ao legado de Yasujiro Ozu, un retrato da vida humana transparente na súa crueza. Son noventa e seis planos fixos desposuídos de calquera outro recurso que o da imaxe e o son do ambiente para construír unha crónica desbordante de realidade.

Ás 19 h. poderemos conversar con Ana Domínguez a propósito da presentación do seu filme Os fillos da vide en Numax. Regresando ás súas raíces, Domínguez adéntrase nunha viaxe que vai do persoal ao ancestral a través dos ciclos da vida e das estacións, os viñedos, a vendima e o viño. Os ritos, os ritmos da natureza e as tradicións en perigo de extinción, mediante as paisaxes e de quen as habita, debuxan esta mirada na que etnografía e emoción se funden nunha revelación das correntes pagás e míticas das bacanais que son as festas populares, explosións de fertilidade e de vida.

Ao longo deste luns teremos tamén novas oportunidades de asistir ás proxeccións de exitosos filmes como a gañadora do Oso de Ouro de Berlín Touch me not, da romanesa Adina Pintilie (ás 16 h. no Salón Teatro); o elegante filme de horror In Fabric, de Peter Strickland (ás 20 h. no Teatro Principal); The kindergarten teacher, de Sara Colangelo, ás 18:15 h. no mesmo Principal; a divertida Non Fiction de Olivier Assayas, que se pasará por última vez neste festival no Salón Teatro ás 18:15 h.; ou a excelente distopía mexicana Cómprame un revólver, de Julio Hernández Cordón (no Principal ás 16:30 h). Tamén será o último pase de Loro / Silvio e os outros, o agardadísimo e exitoso filme de Paolo Sorrentino sobre o particular paraíso hortera e corrupto do ex primeiro ministro italiano Silvio Berlusconi, interpretado aquí por un sempre magnífico Toni Servillo.

PROGRAMACIÓN CINEUROPA LUNS 26

TEATRO PRINCIPAL

16:30 CÓMPRAME UN REVÓLVER Julio Hernández Cordón

18:15 THE KINDERGARTEN TEACHER Sara Colangelo

20:00 IN FABRIC Peter Strickland

22:15 LORO / SILVIO E OS OUTROS Paolo Sorrentino

SALÓN TEATRO

16:00 TOUCH ME NOT Adina Pintilie

18:15 DOUBLES VIES / NON-FICTION Olivier Assayas

20:15 FLEUVE NOIR Érick Zonca

22:30 SUPPORT THE GIRLS Andrew Bujalski

MULTICINES COMPOSTELA (SALA 2)

17:30 FOTOGRAF* Irena Pavlásková

20:00 EL SEXO ESTÁ LOCO* Jesús Franco

21:30 KOI NO TSUMI / GUILTY OF ROMANCE* Sion Sono

MULTICINES COMPOSTELA (SALA B)

22:00 PARTIES FINES / EDUCATION OF THE BARONESS* Gérard Kikoïne

CINEMA NUMAX

17:30 WIÑAYPACHA / ETERNIDADE Oscar Catacora

19:00 OS FILLOS DA VIDE * Ana Domínguez, con presentación e coloquio.

20:45 COINCOIN ET LES Z’INHUMAINS / COINCOIN CONTRA OS EXTRATERRESTRES Bruno Dumont

SEDE AFUNDACIÓN

17:00 L’ULTIMA DONNA / A ÚLTIMA MULLER* Marco Ferreri

SALA AGUSTÍN MAGÁN (CC. SANTA MARTA)

16:30 THE TRIGGER EFFECT / O EFECTO DOMINÓ* David Koepp

18:15 SANS TOIT NI LOI / SEN TEITO NIN LEI* Agnès Varda

20:15 LITTLE ODESSA / CUESTIÓN DE SANGUE* James Gray

Nota: as películas marcadas cun asterisco son de entrada libre.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial