Avanza a concentración de Gonzar, en O Pino, despois de ser reclamada no Parlamento

0

O Pino, 13 de novembro do 2019 – A parcelaria de Gonzar, O Pino, que levaba parada 19 anos avanza de novo despois de que os socialistas presentaran en outubro unha serie de iniciativas parlamentarias, tal e como contamos en Lindeiros.

Os veciños afectados están convocados o próximo martes 19, as doce da mañá, na Casa da Cultura de Arca. Alí coñecerán o trazado que terán os novos camiños da concentración parcelaria de monte da parroquia.

A xefa territorial da Consellería de Medio Ambiente, Mónica López, a xefa de servizo e o técnico da concentración explicáronlles os planos ao alcalde e aos representantes veciñais que forman a comisión xestora.

Comezo das obras en marzo

As obras para facer as pistas da concentración de monte de Gonzar poderían comezar o vindeiro mes de marzo. Antes haberá dous períodos de exposición pública, para que os propietarios poidan coñecer todos os detalles. Na reunión do vindeiro martes, a Consellería de Medio Ambiente ensinaralle as trazas dos camiños forestais á veciñanza (o lugar polo que se irán as pistas da parcelaria). Despois abrirase un período de exposición pública de 1 mes para presentar suxestións e posibles alegacións.

Concentración en GonzarCon estas suxestións, os técnicos elaborarán o proxecto completo da parcelaria, que se volverá a expor ao público durante outro mes. Na parcelaria de Gonzar abriranse 32 quilómetros de pistas, con 4 metros de ancho de plataforma máis as beiravías.

Despois dos períodos de exposición públicas marcaranse sobre o terreo os puntos polo que irán estas pistas, ata liberar un total de 10 metros de ancho, e daráselles un tempo aos actuais propietarios para que corten e vendan a madeira antes de que empecen as obras para construír estas pistas. A previsión é que no mes de marzo poidan xa comezar a traballar ás máquinas.

A concentración parcelaria do monte de Gonzar supón unha inversión de preto de 1,8 millóns de euros, e vai supor abrir 9 km de pistas novas, e outros 23 km que se executarán sobre camiños actuais, para un total de 32 quilómetros de pistas forestais. A apertura de pistas é a parte máis custosa da parcelaria, indicaron os técnicos.

Na reunión tanto os veciños membros da comisión xestora da parcelaria como o alcalde xa lle pediron aos técnicos que contemplen facer ‘abanicos’ nos cruces das pistas, ampliar a zona de rodadura para facilitar o tránsito, o viraxe e as manobras tanto da maquinaria agrícola como de vehículos pesados. As obras desta parcelaria serán acometidas pola empresa pública Tragsa.

Actualizar títulos de propiedade

Outro dos temas que pediron os representantes da Consellería de Medio Rural é que aqueles veciños que compraran leiras ou herdaran propiedades na parroquia de Gonzar actualicen a información e a remitan a Delegación Territorial (poden facelo a través do Concello de O Pino) para ter en conta aos propietarios actuais no momento de facer a distribución e asignación das novas parcelas.

As bases da concentración parcelaria de monte de Gonzar son do ano 2008, polo que os técnicos consideran que houbo moitos cambios de propiedades dos terreos. “Se aportan agora a documentación, o proceso é moito máis fácil e non se retrasa nada”, indicaron na reunión.

Todos estes temas, ademais dos trazados das pistas da concentración, poderán coñecelos os veciños de Gonzar o vindeiro martes na reunión que se celebrará na casa de cultura de Arca. Despois, deixarase unha copia dos planos no local parroquial de Gonzar e outra no concello para que os poidan consultar todos os propietarios de terreos.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial