O Pino, 17 de xullo do 2020 – O concello do Pino segue facendo caso omiso das peticións do Valedor do Pobo e ven de recibir unha nova advertencia da institución.
A denuncia dos socialistas, por no se lle facilitar as actas das xuntas de goberno e dos plenos, motivou xa tres escritos do Valedor ao concello do Pino. O último deles hai dous días e nun ton moito máis imperativo.
No escrito a institución lémbralle ao concello o artigo 22.1 da Lei do Valedor do Pobo “impón a todos os organismos e dependencias administrativas aos que o Valedor requira informe sobre a tramitación das queixas a obriga de remitilos no prazo de quince días”
O Valedor engade ademais que “o apartado 2 do mesmo artigo engade que a negativa ou neglixencia de calquera organismo, funcionario ou dos seus superiores responsables ao envío dos informes solicitados poderá ser considerada polo Valedor do Pobo de Galicia como hostil e entorpecedora das súas funcións, facéndoa pública de inmediato e destacando tal cualificación no seu informe anual ou especial, se é o caso, ao Parlamento”.
O concello ten agora un novo prazo de cinco días para remitir a información solicitada e do contrario será declarado hostil.