O Pino, 8 de outubro do 2020 – O grupo socialista do concello do Pino ven de enviar por rexistro unha solicitude para o concello devolva parte das cotas das actividades deportivas.
Piden a devolución da parte proporcional das cotas correspondentes á tempada 2019 – 2020, tanto de escolares como de adultos. Lembran que a declaración do estado de alarma, o pasado 14 de marzo, interrompeu as clases durante os meses de marzo, abril e maio.
O Psoe remite o escrito a atención do alcalde e explica que “os inscritos en ditas actividades abonan a cota anual no momento da inscrición, normalmente en setembro ou outubro, e a causa da suspensión é extraordinaria e non pode ser imputable aos participantes nas mesmas”.
Así mesmo, demandan que se poña á disposición de todos aqueles interesados/as un escrito-formulario para que poidan solicitar a devolución, e que o mesmo conteña un apartado para indicar o número de conta para o posterior abono.