O Pino, 7 de maio do 2019 – O Concello de O Pino celebra este sábado 11 de maio a décimo sexta edición da súa Carreira Pedestre Popular na localidade de Arca – Pedrouzo baixo o control técnico da Federación Galega de Atletismo.
As inscricións están abertas en www.emesports.es ata o mércores 8 de maio. Esta proba pertence ao VII Circuito de Carreiras Populares da Deputación da Coruña. Na XVI Carreira Pedestre Popular haberá unha clasificación conxunta para atletas federados e non federados. As categorías de participación están divididas por idades, entre as que se distinguen a de menores e adultos. Nestas dúas atópanse 14 rangos diferentes que van dende Sub 6 á Master 4, segundo a data de nacemento dos participantes. Cada proba contará cun percorrido e hora de saída diferentes.
As inscricións poden realizarse ata o mércores 8 de maio ás 23:59 horas a través de www.emesports.es e de forma gratuíta para as probas escolares (de sub 6 a sub 18), mentres que as adultas terán un custo de 5€. Os clubs poden anotarse conxuntamente. Por outra banda, a recollida de dorsais farase no Centro Sociocultural Luis Seoane (Arca) nun prazo límite de ata media hora antes do inicio de cada proba.