O programa de residencias do CDG retoma a actividade con Proxecto Pank e Fumboa Escénica

0

Compostela, 10 de xaneiro do 2019 – O programa de residencias que o Centro Dramático Galego mantén no Salón Teatro acolle tres pezas asinadas por Proxecto Pank e Funboa Escénica.

Este Ciclo Pank 2019 arrancará co espectáculo Masa madre + Sal marina, que o binomio creativo formado por Cristina Balboa e Manuel Parra García representará este venres 11 e o sábado 12 de xaneiro, ás 20,30 h.

Masa Madre + Sal Marina

O domingo 13, o pano levantarase ás 18,00 h. para Eso que vi, mentres que o xoves 17, ás 20,30 h., Cristina Balboa compartirá cos espectadores o traballo creativo arredor de O que segue, a súa nova proposta, en proceso de desenvolvemento.

A través do seu programa de estadías, o Centro Dramático Galego pon a disposición destas compañías as instalacións da súa sede e o apoio do equipo técnico para ultimar ou perfeccionar as súas propostas, moitas delas enmarcadas ademais na iniciativa Dramaturxente para o apoio, fomento e promoción das novas dramaturxias galegas.

Eso que vi

O punk en escena

É o caso de Masa madre + Sal marina, a peza coa que dá comezo o Ciclo Pank esta fin de semana e para a que contaron co apoio do fondo internacional Iberescena a través das súas axudas á creación dramatúrxica e coreográfica. A peza toma o seu título da canción que naceu do encontro entre os seus creadores e intérpretes, no que decidiron que querían facer teatro xuntos. Nas súas palabras, axiña cambiaron de idea para intentar dedicarse á música, compensado a súa falta de talento musical co entusiasmo que lles produce escoitar un “temazo” ou formar parte del, xa que o seu soño compartido é o de ser estrelas do punk.

O domingo será Manuel Parra García quen suba as táboas en solitario con Eso que vi, unha peza escénica para “activarse en público ou lerse en solitario”, que amosa a influencia das imaxes televisivas e do cinema mexicano no corpo do artista exiliado Estanislao Barrientos. Empregando recursos da novela, a crónica, o thriller e a écfrase, Barrientos describe algunhas pasaxes da súa vida en paralelo coa historia do país convulsionado que lle tocou habitar.

O que segue

Xa a semana que vén, o xoves 17 será Cristina Balboa quen lle achegará ao público compostelán o work in progress de O que segue, proxecto no que a artista comparte as súas fantasías sobre o éxito, que a levan a seguir buscando a idea perfecta para o seu espectáculo.

A entrada para O que segue será gratuíta, previo paso polo despacho de billetes do Salón Teatro. Pola súa banda, os billetes para Masa madre + Sal marina e Eso que vi xa están á venda en entradas.abanca.com e no teléfono 902 434 443 a un prezo de 8 euros (cos descontos habituais) e de 5 euros (tarifa única do Día do Espectador), respectivamente. Poderán adquirirse, así mesmo, no despacho de billetes do teatro, aberto desde dúas horas antes do comezo das funcións, onde tamén estará dispoñible un bono de 10 euros para os tres espectáculos.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial