Bisbarra, 1 de xuño de 2019. Os socialistas da provincia da Coruña elixiron a Valentín González Formoso como candidato á presidencia da Deputación da Coruña, cargo que ostentou os últimos catro anos
O Comité Provincial, no que están representadas todas as agrupacións locais, aprobou a candidatura do actual secretario xeral cun 98% de apoio e ningún voto en contra (147 a favor e 3 abstencións). Na súa intervención previa á votación, González Formoso asegurou que nos próximos catro anos “manteremos un criterio de reparto de axudas xusto e equilibrado, ademais de potenciar as iniciativas para fomentar o emprego e loitar contra a despoboación”.
“Creo que estes catro anos xestionamos unha Deputación transparente, obxectiva e cercana á xente, respectando a autonomía municipal e dándolle un gran impulso ao plan único e os plans de emprego”, afirmou o secretario xeral dos socialistas da provincia.
Balance electoral
A reunión serviu tamén para que os socialistas fixeran balance das municipais do pasado domingo. Os resultados foron moi satisfactorios, cun aumento do voto do 42% e a aspiración de ser a forza que goberne en máis concellos.
En concreto, o PSOE obtivo 53.000 votos máis que hai catro anos na provincia e case 100 concelleiros e concelleiras máis. Na Deputación, pasouse de 8 a 11 deputados. Os socialistas son primeira forza en 32 concellos, 22 deles con maioría absoluta.
“Por maioría absoluta ou relativa, estamos en condicións de gobernar nestes 32 concellos, pero noutros dez podemos facelo a través de pactos progresistas liderados polo PSOE”, engadiu Formoso.