Touro, 6 de setembro do 2018 – Fonte Díaz acolle o próximo sábado, 8 de setembro, o seu XX Slalom Concello de Touro puntuable para o Campionato Galego.
A proba automobilística, cita obrigada no calendario de setembro, é puntuable para o Campionato de Galicia de Slalom 2018. O circuíto da proba, organizada pola Escudería Touro Motor e patrocinada polo Concello, será de asfalto e está situado nas rúas de Fonte Díaz, capital do municipio.
Os organizadores, como xa é de costume, confían na afluencia tanto de pilotos e escuadras de toda Galicia como de afeccionados ao mundo do motor. Tamén apoian a proba a Federación Galega de Automobilismo e a Xunta de Galicia, a través da Secretaría Xeral para o Deporte.
A proba comezará coas verificacións administrativas e verificacións técnicas. A presentación dos pilotos no parque pechado e a publicación da lista dos pilotos que tomarán a saída está prevista para as 11.00 horas. Ás 11.30 horas procederase a iniciar a saída dos adestramentos libres. A primeira manga dos adestramentos oficiais comezará ás 15.00 horas. As saídas da primeira e segunda manga oficial será cando remate a manga de adestramentos oficiais. Ao finalizar a segunda manga oficial publicaranse os resultados e procederase á entrega de premios.