O Monbus Obradoiro consegue a súa oitava Copa Galicia consecutiva

0

Compostela, 26 de setembro do 2017 – O Obradoiro conseguiu a oitava Copa Galicia consecutiva gañando ao Café Candeas Breogán por 75 a 71.

Os de Moncho Fernández saltaron á pista sendo conscientes de que debían empregarse a fondo para conquistar a súa oitava Copa Galicia consecutiva. Erraron en ataque os dous equipos nos primeiros minutos do partido e o Café Candeas Breogán fixo que o Monbus Obradoiro non se sentise cómodo na pista. Artem Pustovyi anotaba desde debaixo de canastra para poñer ao seu equipo por diante coa axuda de Llovet e Thomas desde triplo, pero non tardou o conxunto lucense en reaccionar cun parcial de 0-6 para adiantarse no marcador. O primeiro cuarto pechouse tras unha canastra de Pechacek tras rebote cun 16-17 reflectido no marcador.

 O segundo tempo estivo marcado pola mellora na porcentaxe de acerto exterior por parte de ambos os equipos. Dous triplos de Simons xunto aos dous de Corbacho mantiñan a igualdade no encontro. O equipo lucense aumentou a distancia poñéndose 6 puntos por encima ao que o conxunto compostelán respondeu cun parcial de 10-2 que os puxo por diante para finalizar o cuarto 40-38.

Tras o paso polos vestiarios, Thomas guiou ao seu equipo grazas aos seus tiros desde o perímetro pero a falta de acerto do Monbus Obradoiro permitiu coller carrerilla ao Café Candeas Breogán que, con catro puntos de Demetrio e cinco de Cigoja, puxeron ao seu equipo oito arriba para finalizar o terceiro cuarto (49-57).

 No último cuarto ambos os equipos colleron moito máis ritmo e o encontro viuse marcado pola intensidade e o intercambio de canastras entre ambos. A mellora no aspecto defensivo por parte do equipo obradoirista e un parcial de 8-4 fixo que Natxo Lezkano parase o partido con tempo morto. A igualdade mantívose ata os minutos finais cando Thomas igualou o marcador cun triplo (69-69). O Café Candeas Breogán puido sentenciar o partido pero perdeu o balón. Esta recuperación de balón, sumada ao acerto dos tiros libres de Llovet e unha canastra de Bendzius fixo que a vitoria caese ao lado santiagués, conseguindo alzar a oitava Copa Galicia consecutiva para despedirse da pretempada ante todos os afeccionados que se desprazaron ata Marín para animar e apoiar ao equipo. A semana que vén comeza a liga Endesa para o Monbus Obradoiro, que recibirá ante a súa afección o vindeiro sábado, ás 20:00 horas, ao Tecnyconta Zaragoza.

FICHA TÉCNICA

Monbus Obradoiro 75: Sàbat (2), Llovet (17), Pustovyi (6), Navarro (8) e Thomas (21) ? quinteto inicial -, Simons (6), Gómez (0), Bendzius (3), Pechacek (4), Corbacho (6), Pozas (2) e Laksa (0).

Café Candeas Breogán 71: Jerker (14), Arco (11), Rubio (8), Díaz (7), Demetrio (12) ? quinteto inicial ? Úriz (6), Beltrán (0), Cigoja (7), López (0), Fuzaro (4) e Quintela (2).

Árbitros: Pérez, Cortés e Rial.                               Parciais: 16-17, 24-21, 9-19 e 26-14.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial