Ordes, 31 de agosto do 2018 – O Concello de Ordes comunica o prazo de matriculación para o próximo curso da Escola Municipal de Música, que comeza o próximo luns e rematará o 17 de setembro.
Para poder matricularse na Escola Municipal de Música serán requisitos indispensables ter como mínimo tres anos de idade (non hai idade máxima) e estar escolarizado. As dilixencias pertinentes levaranse a cabo no Departamento de Educación, situado no primeiro andar do Concello.
Haberá dous tipos de matrícula: a sinxela (unha soa asignatura) e a completa (máis dunha asignatura). O importe desta será de 67 € por unidade familiar, puidendo beneficiarse as familias numerosas dun desconto do 50%. As mensualidades serán de 20 € para a sinxela e 40 € para a completa.
O plan académico deste ano estrutúrase en catro cursos de formación para, unha vez concluídos, acceder ao nivel de perfeccionamento. Tamén terase a posibilidade de preparación do acceso ao grao profesional do conservatorio. As opcións serán: música e movemento, linguaxe musical, coro, combo rock, banda de inicio, banda xuvenil de ventos e percusión e big band. Como especialidades manteranse as clases de guitarra, piano, trompeta, trombón, tuba, trompa, bombardino, clarinete, saxofón e frauta.
