Ordes, 9 de setembro do 2019 – O Concello de Ordes celebrará o vindeiro venres, día 13, a segunda edición do Día do Deporte no que poderá participar todo o mundo sen inscrición e de balde.
O Día do Deporte celebrarase no Campo da Feira e no caso de choiva trasladarase ao pavillón Campomaior.
A través desta iniciativa poderanse ampliar coñecementos, obter información ou experimentar a práctica de modalidades deportivas como o Aikido, taekwondo, atletismo, tiro con arco, tenis, fútbol, fútbol sala, orientación, patinaxe artística, ximnasia rítmica, baloncesto, kickboxing, pádel e hóckey ou patíns. Os participantes tamén terán a oportunidade de recibir agasallos e entrar no sorteo de material deportivo sempre que cheguen a completar o circuíto de actividades previsto pola organización, o cal pasa por cada unha das áreas reservadas a cada deporte. Para participar deberá recollerse un cupón na zona de organización ese mesmo día.
Para a posta en marcha desta xornada o Departamento de Deportes do Concello conta coa colaboración de Sportec e a Casa Grande de Xanceda, ademais do apoio dos seguintes clubs: Club Patinaxe Galia, Club Atletismo Ordes, Jogafán F.S., Boud-Sport Club de Taekwondo, Asociación de Taekwondistas da Comarca de Ordes, Sociedade Deportiva Club Órdenes, A.C. Órdenes, Club SEO, Adarve, Ximnasia Rítmica Carral/Ordes, K2 Ordes, Pádel Club, Kickboxing OPC Fitness, Asociación Galega de Aikido Dentou Iwama Ryu, ISAASK, CAB Obradoiro e a Asociación Enfeitizados.