Ordes, 18 de decembro do 2019 – O colectivo Salvemos a Comarca de Ordes advirte da solicitude dun novo parque eólico que afectaría ás aldeas de Axáns, o Seixo, A Barcula e Hospital de Bruma.
Ante a solicitude de este novo parque eólico a asociación ven de convocar unha reunión este domingo, día 22 as doce do mediodía, no recinto feiral de Mesón do Vento para intercambiar impresións sobre a situación.
Monte San Bartolomé
A solicitude denomina ao complexo Monte San Bartolomé. Estaría situado a terreos do concello de Ordes, principalmente na zona de Mesón do Vento, Ardemil, A Barcula e Axáns; de Mesía en Hospital de Bruma; e aos municipios de Vizoño e Carral.
Aeroxeradores de 150 metros
A asociación consultou a semana pasada vía internet o Rexistro Eólico da Xunta de Galicia, e comprobou que no mapa de proxectos da zona, aparece esta nova solicitude, que estaría levando a cabo a compañía Enel Green Power, filial de Endesa. O parque que solicita implantar a compañía estaría formado por 11 aeroxeradores de 150 metros de diámetro, os máis grandes proxectados para a comarca de todos os presentados até o de agora.
O colectivo destaca da petición que dito parque inclúe eólicos en localizacións iguais ás do chamado “Parque Eólico Ardemil”, que xa fora solicitado hai máis dun ano por Green Capital Power e que finalmente esta empresa retirou ante as presións da veciñanza e debido á proximidade ás casas.
O novo parque solicitado agora volve ter muíños de vento xigantes en fincas que están no propio Camiño de Santiago (Inglés), e ademais hai eólicos que invaden terras da Reserva da Biosfera das Mariñas Coruñesas e Terras do Mandeo.
A ubicación dos muíños (pódese consultar aquí) inclúe aeroxeradores a pouco máis de medio quilómetro das casas de Axáns, da Barcula, do Seixo e do Hospital de Bruma, onde está localizado o albergue de peregrinos público.