Oroso, 19 de febreiro do 2020 – O concello de Oroso ven de incluir no inventario de bens municipais a vella estación de carga do ferrocarril situada en Trasmonte.
O concello asume así a antiga vivenda do xefe de estación, que servía de despacho de billetes, e un almacén próximo ademais do terreo que o rodea. A intención de uso para o edificio de Trasmonte e destinalo a hostalería, servizos sociais ou de outro tipo.
O edificio está situado nos terreos polos que pasará a Vía Verde que unirá Santiago con Cerceda. O Concello de Oroso ten planificada a posta en marcha na zona dunha estación de carga de bicicletas eléctricas. Por outra parte, o concello solicitou tamén a Adif poder facerse cargo do almacén doutra das estacións que había no municipio, a de Vilacide-Oroso. En canto consiga a cesión, pretende destinalo a usos culturais ou recreativos.
“Son novidades importantes para o noso concello, xa que a Vía Verde impulsará as zonas nas que están ubicadas as vellas estacións e queremos sacar proveito aos edificios con proxectos para a veciñanza”, asegura o alcalde de Oroso, Manuel Mirás, un dos grandes impulsores do sendeiro.
As obras, das que se fará cargo a Deputación da Coruña con 1,86 millóns de euros de fondos Feder, suporán a construción da primeira Vía Verde da provincia, que conectará Santiago e Cerceda cun sendeiro de 36,5 quilómetros sobre as antigas vías do ferrocarril.