Oroso, 14 de febreiro do 2020 – O alcalde de Oroso, Manuel Mirás, reuniuse co de Compostela, Xosé Sánchez Bugallo, do que conseguiu o apoio para a nova circunvalación municipal.
A circunvalación de Sigüeiro aliviará o tráfico polo núcleo urbano máis importante do concello. A reunión, que tamén falaron do transporte metropolitano ou a vía verde, foi cualificada de “cordial e frutífera” por ambos os dous rexedores.
A circunvalación
A nova infraestrutura iría desde a rotonda do polígono (supermercado Familia) ata a bifurcación da estrada que vai ao aeroporto de Lavacolla, un percorrido que afecta a Compostela e Oroso. Os dous concellos realizarán xestións co Ministerio de Fomento para que axilice os prazos de execución do proxecto. “Preto do 20% do tráfico que pasa pola N-550 en Sigüeiro é de vehículos pesados, por iso lle pido a Fomento que impulse a nova circunvalación”, lembra Mirás.
Vía verde
Na reunión, falaron tamén da Vía Verde que unirá Santiago e Cerceda, pasando por Oroso, cun sendeiro de 36,5 quilómetros sobre as antigas vías do ferrocarril. As obras, das que se fará cargo a Deputación da Coruña con 1,86 millóns de euros de fondos Feder, suporán a construción da primeira Vía Verde da provincia.
“É un proxecto polo que levo loitando dende hai 14 anos, xa conseguimos financiación europea a través da Deputación e coido que nesta lexislatura será unha realidade; dará moito do que falar e irá sobre o trazado do ferrocarril entre A Sionlla e Cerceda, que quedou en desuso”, explica o alcalde, Manuel Mirás.