Compostela, 2 de novembro do 2018 – Dentro das actividades do Outono Códax Festival esta tarde inaugúrase a mostra gráfica de Roberto Argüelles na tenda A Reixa Matriosca, na rúa do Hórreo.
A exposición TRASH recolle unha selección da obra do debuxante e deseñador vigués Roberto Argüelles. Como é habitual en cada edición, o Outono Códax Festival completa a súa proposta musical con distintas actividades paralelas polo que, fiel á súa filosofía, nesta VIII edición e da man de La Fiambrera Art Gallery, inclúe na súa programación a mostra do creador galego.
Argüelles (Vigo, 1972) quixo titular a mostra como TRASH (palabra anglosaxona que significa literalmente “lixo”) en referencia ao que se entende no ámbito artístico como todo o que ten que ver co underground, a contestación social e política, o “feo” ou de “mal gusto” ou as artes consideradas menores como a banda deseñada, a televisión, o cine de serie B, o cabaré ou os debuxos animados; en definitiva, todo un universo de produtos e “actitudes” que quedan fóra das esferas consideradas máis elevadas da arte e a cultura.
E é precisamente neste underground no que sempre se moveu o creador galego, tal e como así reflicte o seu traballo, tanto como deseñador gráfico como na súa obra artística. Así pois, a exposición recolle un conxunto de pezas, fundamentalmente acrílicos e serigrafías, nas que Argüelles mostra todas as súas filias e influencias estéticas, así como algunhas das súas iconas favoritas. Deste xeito, a mostra evoca aos debuxos de Tex Avery e Hanna-Barbera; aos cómics clásicos de Marvel dos mestres Stan Lee e John Romita; á ciencia ficción xaponesa dos anos 60 (Ultraman, Godzilla,…); aos monstros hot-rod saídos do lapis de Ed “Big Daddy” Roth; ás pin-ups e as bailarinas de burlesque; á loita libre mexicana de El Santo e compañía; á arte tiki; ás portadas das novelas de detectives dos anos 50 e, por suposto, ao rock&roll e o punk.
Roberto Argüelles formouse academicamente en deseño gráfico mentres compaxinaba a súa andaina como debuxante en distintos fanzines. Máis adiante comezou a realizar traballos para diferentes editoriais como ilustrador profesional e logo xa como parte de diferentes estudos de deseño gráfico. Os seus traballos máis coñecidos son os relacionados coa música independente: carteis para festivais e concertos de artistas españoles e internacionais, portadas de discos e mesmo logotipos. Hai uns anos iniciou o seu propio proxecto como autor. Sempre moi ligado á escena musical, pero desenvolvendo todo tipo de encargos dentro da creación gráfica e a ilustración.
Foi a mediados de 2015 cando comezou a traballar coa galería La Fiambrera de Madrid realizando obra propia e, agora, chega a Santiago cunha selección desa obra nunha mostra que será inaugurada, coa presenza do propio autor, ás oito de esta tarde, en A Reixa-Matrioska Tenda (rúa do Hórreo, 46), onde permanecerá aberta ao público de balde ate o vindeiro 30 de novembro.
Antesala da próxima gran cita co festival galego de música negra
A apertura desta exposición servirá de antesala á próxima gran cita co festival galego de música negra a seguinte fin de semana, cando o venres, 9 de novembro, aterre en Compostela Luke Winslow King e ao día seguinte (sábado, 10), o fagan Marta Ren e Marem Ladson.
Deste xeito, Winslow King (considerada unha das voces máis autorizadas dos novos tradicionalistas do son Nova Orleans) ofrecerá un dos concertos íntimos do Outono Códax o venres na Sala Riquela, mentres que Marta Ren (unha das frontwoman máis destacadas do actual panorama soul europeo) e Marem Ladson (a galega que está abraiando co seu incrible disco de debut homónimo) encherán o sábado a Sala Capitol con sons de tanta calidade como alto voltaxe.
