Padrón, 20 de febreiro do 2018 – A formación Veciños de Padrón levou a pleno, o pasado verán, a situación dunha pulpería no Campo da Barca que ano tras ano instalábase sen licenza. Agora, despois de varios anos, a súa instalación sae a concurso.
Veciños de Padrón denunciaran en repetidas ocasións nas redes sociais, e no pleno en último extremo, a situación de esta pulpería irregular que era consentida polo equipo de goberno. Tratábase dunha carpa instalada, en cada edición da feira cabalar, nun lugar privilexiado e que desde o 2012 nunca saíra a concurso.
Veciños explica que “durante todo este tempo, a organización das festas correu a cargo do goberno do Partido Popular e tamén, nos anos 2013 e 2014, dos dous concelleiros do Partido Galeguista Demócrata que fai un ano volveron a aliarse co PP e a adquirir responsabilidades en varias áreas de goberno, entre elas, a de festexos”.
No pleno realizado en verán no que Veciños preguntou pola cuestión a resposta do goberno foi que a parcela non se licitara no 2017 “debido a un erro”. A portavoz da formación, Teresa Rey, preguntou entón polo resto dos anos nos que a situación irregular se repetira pero non obtivo máis resposta ca un “non o sei” malia ter presentado a pregunta por escrito e con 24 horas de antelación, tempo estimado no que o goberno ten a obriga legal de preparar as cuestións e de respondelas.
Veciños de Padrón engade que “o único que souberon dicir dende o bipartito Partido Popular-Partido Galeguista ante as cuestións de Veciños de Padrón, foi que o Concello non percibiu ningún tipo de compensación polo cesión da parcela e a utilización deste espazo público, unha situación de extrema gravidade. Máis semella que agora, só uns meses despois de mentir abertamente en pleno por esta cuestión, o goberno do PPGD considerou que si é preciso licitar este espazo”.
A formación padronesa di tamén que seguirán investigando pola “falta de repostas e de claridade por parte do rexedor municipal e do seu equipo e o seu sospeitoso xeito de proceder con respecto a esta parcela; Veciños de Padrón non pode máis que preguntarse cales foron os beneficios que obtiveron os membros do goberno para estar dispostos a rachar coa legalidade vixente e a permitir, con coñecemento de causa e durante 6 anos, agravios comparativos entre todos aqueles que pagan unha contía pola explotación dunha parcela nas Festas de Pascua e os que non”.
