Compostela, 15 de decembro do 2020 – O Servizo de Normalización Lingüística da USC publica en liña un vocabulario con cerca de 200 conceptos sobre a COVID-19.
Tanto polo seu volume como por centrarse especificamente sobre esta patoloxía, trátase dun traballo novidoso no ámbito da lingua galega. Para cada un deses conceptos sobre a Covid ofrécese a súa definición, os nomes polos que é coñecido en galego, español e inglés, e a área ou áreas temáticas en que pode inscribirse.
En este vocabulario pode atoparse léxico sobre as características e a morfoloxía do virus, as vías de transmisión e contaxio, as probas diagnósticas, as patoloxías asociadas, a análise epidemiolóxica, os equipos e instrumentos de protección, o fármacos empregados no seu tratamento ou as medidas de saúde pública adoptadas.
Intégrase con bUSCatermos (a base de datos de terminoloxía técnica da Universidade de Santiago de Compostela), a onde liga cada unha das denominacións galegas que forman os Termos esenciais. É en bUSCatermos onde se pode despregar e consultar toda a información que antes indicabamos. Pero tamén se pode facer a busca directamente a través da interface de consulta que ofrece a propia base de datos.
Ao tratarse dun ámbito en que as novidades técnicas, e en consecuencia, terminolóxicas, se están producindo a diario, o Servizo de Normalización Lingüística da USC elaborou un produto doado de actualizar e ao que se puidese incorporar nova información con moita axilidade: por iso a publicación directa na web.
Publícase baixo unha licenza Creative Commons Atribución-Compartir igual 4.0 (CC-BY-SA 4.0), que permite a redifusión e a adaptación deste material noutros produtos ou soportes diferentes, sempre que estes se distribúan tamén baixo a mesma licenza.