Teo, 1 de decembro do 2020 – O Partido Popular de Teo reclama que sexa convocada a Xunta Local de Seguridade de Teo despois dos últimos roubos na urbanización Os Tilos.
A concelleira Uxía Lemus recoñecía hai unha semana, en declaracións a Cadena Cope, que a diferencia con anos anteriores é que se están a producir en pisos cando o habitual era en chalés. A Primeira Tenente de alcalde explicaba tamén que se reforzara a vixianza na zona con efectivos dea Policía Local de paisano.
Petición Popular
José Manuel Guerra, en nome do Partido Popular de Teo, presentou no rexistro municipal, a solicitude na que esixe a convocatoria inmediata da Xunta de Seguridade Local, ante esta nova vaga de roubos.
Os Populares explican que logo das intermitentes e continuas vagas dos anos anteriores, e a anterior do mes de xaneiro, os roubos en Teo volven ser unha constante.
Engaden que esta sucesión de incidentes con múltiples roubos en diferentes zonas do Concello confirma que a seguridade segue a ser unha materia pendente do executivo local. Piden que se tomen todas as medidas que sexan necesarias e que sexa un tema a debater en común, na solicitada Xunta Local de Seguridade.