Vila de Cruces, 12 de abril do 2021 – O BNG de Vila de Cruces pide un pleno extraordinario no que o concello se posicione contra a instalación de parques eólicos.
Os nacionalistas consideran que é preciso crear unha fronte común contra todas estas megaestructuras que “o único fin é esquilmar o noso territorio, roubar a nosa enerxía e repercutir negativamente na saúde da veciñanza e da nosa contorna”.
O voceiro Municipal Alex Fiuza explica que nos últimos meses coñecéronse varios estudos de impacto medioambiental para a instalación dos parques eólicos proxectados na comarca e as súas liñas de evacuación. En Vila de Cruces están proxectados os seguintes parques: Axouxere (22,5MW) Cunca ( 22,5MW) Rodeira (22,5MW), dos cales no mes de novembro, Green Capital Power, sacou a exposición pública a liña de evacuación dos tres.
O BNG de Vila de Cruces presentou unha serie de alegacións contra a esta liña de evacuación. As alegacións parten da demandas da veciñanza, recollidas nunha xuntanza realizada en Bodaño e á que acudiron o voceiro Alex Fiuza e a concelleira Beatriz Gómez.
As liñas de evacuación dos parques eólicos da comarca van cara a Subestación de REE en Silleda e cara Portodemouros. Esta liña de evacuación que cruzará o concello de Vila de Cruces cara a Silleda tamén vai evacuar a enerxía producida nos parques eólicos que están proxectados en Agolada e Rodeiro (en total 7) polo que unha nova liña cruzará o concello para unilos. Por outra banda, os parques eólicos de Orrea (Agolada), tamén evacuarán a súa enerxía atravesando o concello, para rematar na subestación de Portodemouros. A estas liñas súmase unha máis, o parque eólico da Mesada, proxectado no 2012, e que afecta ás parroquias de Sabrexo e Ferreirós, o cal foi modificado en varias ocasións pola súa proximidade a restos arqueolóxicos, e da cal aínda non hai constancia se evacuará a enerxía cara a Silleda ou cara a Portodemouros, se compartirá estruturas eléctricas cos outros parques, ou polo contrario terá a súa propia.
Na actualidade está en fase de exposición pública os parques de Lalín, cuxa liña de evacuación tamén afectará a Vila de Cruces na parroquia de San Pedro de Losón. En resumo, proxéctanse en Vila de cruces un total de 4 parques eólicos e 4 liñas de alta tensión.