Silleda, 1 de outubro do 2020 – O Concello de Silleda lamenta a aparición de varias pintadas nas pedras da croa do Castro de Toiriz, preto do casco urbano da vila.
Os destrozos no Castro de Toiriz foron descubertos pola empresa que está a executar os traballos de posta en valor do xacemento, a través do proxecto Trazas de Pontevedra I, promovido pola Deputación de Pontevedra e o Ministerio de Fomento.
Nas últimas semanas levouse a cabo a limpeza da zona e onte o acceso ao castro quedou valado para o inicio dos traballos. O alcalde, Manuel Cuíña, explica que “É lamentable que se sigan a producir estes feitos vandálicos, que aínda doen máis cando estamos a falar do patrimonio histórico”. A aparición destas pintadas feitas nas pedras, un símbolo inconfundible deste castro, xa foi posta en coñecemento de Patrimonio.
Por outra banda, tamén nos últimos días se detectaron máis accións contra o mobiliario urbano relacionado tamén co patrimonio arqueolóxico. Así, un dos paneis informativos sobre a Mámoa de Carballosa, en Laro, apareceu derribado, e outra das sinais direccionais en madeira tamén desapareceu. “Facemos un chamamento á colaboración cidadá e á importancia de concienciarnos que tanto o mobiliario público e os bens culturais son patrimonio de toda a veciñanza”, engade o alcalde.