Padrón, 8 de febreiro do 2018 – Eduardo Rodríguez Cunha, Tatán, foi o gañador do XVII Premio de Interpretación Maruxa Villanueva de Teatro según o comunicado emitido polo xurado do galardón.
Tatán, según explica o xurado, resultou merecente do galardón pola súa “longa traxectoria e o maxisterio no teatro de obxectos, a súa contribución á construción dun teatro de Títeres galego moderno”. Por outra banda “Rodríguez Cunha, coa compañía Tanxarina, proxectou internacionalmente a produción galega de teatro de obxectos, con especial atención á lusofonía, e impulsou esta arte en Redondela coa Mostra Internacional de Títeres que se celebra na vila”.
Nesta edición, o xurado estivo conformado pola concelleira de Cultura de Padrón, Lorena Couso, como presidenta; como vogais, a escritora e profesora da Escola Superior de Arte Dramático de Galicia Inma López Silva; o actor e profesor da Universidade da Coruña Carlos Caetano Biscainho Fernandez; o dramaturgo, profesor da Escola Superior de Arte Dramático de Galicia, membro do Consello Asesor do Centro Dramático Galego e membro do Consello de Redacción da Revista Galega de Teatro, Alfonso Becerra Rojo; o profesor da Escola Superior de Arte Dramático Roberto Pascual Rodríguez; a actriz, doutora universitaria e especialista en teatro de obxectos Comba Campoy García; e a animadora social do Concello de Padrón, María Cruz Taboada Álvarez, como secretaria.