Compostela, 12 de decembro do 2018 – Esta tarde, 19:30, o Museo do Pobo Galego acolle a presentación do libro, do fotoxornalista José M. Salgado, A idade do ferro.
A Idade do ferro está incluído na colección Imaxes dun País e documenta o estado da cultura do ferro na provincia de Lugo e o occidente de Asturias a través de 181 fotografías. O libro conta ademais cunha ampla presentación do autor e tres introducións de Juaco López (director do Muséu del Pueblu d´Asturies), Luis Celeiro (xornalista) e Clodio González (investigador e membro do Padroado do Museo do Pobo Galego). Estes dous últimos acompañarán a José M. Salgado na presentación de esta tarde.
Este libro vén a completar e a enriquecer a exposición “A idade do ferro. Fotoensaio de José M. Salgado” que co-organizou esta institución con motivo do 40 aniversario do Museo do Pobo no ano 2017. A mostra itinerou por diferentes partes de Galicia: a sede de Afundación de Lugo ou o Museo Etnolóxico de Ribadavia.