A canalización do Portapego comezou hai anos e pasou por distintas fases sen conseguir parar de todo os asolagamentos como xa contabamos en novembro do 2018.
Touro, 16 de febreiro do 2021 – A Xunta de Galicia ven de rematar a canalización do río Portapego en Touro para evitar os asolagamentos do núcleo de Fonte Díaz.
As críticas da veciñanza foron unha constante nos últimos anos. A mineira recibiu distintas sancións polo uso do regato, ou incluso a súa desviación, sen permisos. A veciñanza denunciou tamén en varias ocasións que ás augas que se desbordan por Fonte Díaz “van a parar moitos dos lodos contaminados da mina”
Visita ás obras
O delegado territorial da Xunta na Coruña, Gonzalo Trenor, e o alcalde de Touro, Ignacio Codesido, supervisaron as obras no rego Portapego. A actuación, explicaron, permitirá evitar os asolagamentos que se producen debido aos problemas de canalización.
As obras contemplaron outra actuación na rúa Ramón Cabanillas o que permitiu duplicar a canalización do rego, co fin de solucionar as problemas de enchentes existentes e mellorando as condicións de drenaxe.
Tamén se instalaron arquetas de acceso á canalización para as oportunas operacións de mantemento e rematouse coa reposición da pavimentación afectada no transcurso da obra. Asemade, deuse continuidade ao itinerario peonil xa existente. O importe desta obra ascendeu a preto de 44.000 euros.
O delegado da Xunta lembrou que estas obras de humanización foron posibles grazas a un convenio de colaboración firmado entre a Consellería de Medio Ambiente, Territorio e Vivenda e o Goberno local. Trenor destacou que esta actuación enmarcouse dentro do plan Plan Hurbe, un programa impulsado pola Xunta hai unha década para apoiar ás entidades locais en accións que contribúan a humanizar e incrementar os seus espazos de uso público, promovendo á vez o reequilibrio territorial.
