Ames, 8 de novembro do 2018 – A Aula da Natureza de Ames organiza para este sábado, 10 de novembro, a segunda saída micolóxica das tres programadas para este outono.
A saída micolóxica será dirixida pola experta Sira López. Para participar nesta actividade, que conta con un número limitado de prazas, é necesario inscribirse antes das 14.00 horas deste venres enviando o impreso de inscrición ao enderezo de correo electrónico auladanatureza@concellodeames.gal. Para obter máis información, pódese chamar ao número de teléfono 660 00 46 65, en horario de 9:00 a 14:00 horas.
Debido á previsión de chuvia para esta fin de semana, a saída terá lugar polas carballeiras, prados e a ribeira do lugar de Quintáns, pertencente á parroquia da Ameixenda (polos arredores do edificio da Aula da Natureza) o que facilitará que a xornada transcorra con maior comodidade. Das 11.00 ás 17.30h, os participantes poderán ver, identificar e clasificar o maior número de exemplares posible, facendo unha parada para comer. Cada participante terá que levar a súa comida da casa. Tanto para o traxecto de ida como de volta, habilitarase un autobús que conecte O Milladoiro e Bertamiráns coa Aula da Natureza e que sairá ás 10.30h da Casa da Cultura do Milladoiro, e pasará pola praza do Concello de Bertamiráns 15 minutos despois. Xa pola tarde, outro autobús sairá da Aula da Natureza ás 17.30h para deixar aos participantes en ambas localidades.