Compostela, 19 de xaneiro do 2018 – Xan Duro, como concelleiro de medio ambiente, recibiu na sede Ministerio de Agricultura, Pesca, Alimentación e Medio Ambiente, en Madrid, o galardón outorgado pola Fundación Fórum Ambiental coa colaboración de Ecoembes, e o propio ministerio, como cidade sostible na categoría de xestión de residuos.
Os premios Ciudad Sostenible teñen como obxectivo recoñecer aos municipios e entes locais supramunicipais do Estado que aposten por proxectos e actuacións dirixidas a potenciar a sustentabilidade. O Concello de Santiago recibe a distinción na categoría de xestión de residuos polo proxecto Tropa Verde SCQ, unha plataforma que fomenta a reciclaxe e a responsabilidade ambiental premiando de forma directa as boas prácticas da cidadanía e contribuíndo á redución de residuos.
Na plataforma Tropa Verde están rexistrados máis de 2.000 cidadáns e conseguiuse a patrocinio de 115 establecementos do comercio e da hostalería compostelá. Outros datos que falan do éxito do programa son que, en menos dun ano, repartíronse 4.700 cheques e ofertáronse 1.500 recompensas por un valor de 12.000 euros.
O acto de entrega do premio estivo presidido pola ministra de Agricultura, Pesca, Alimentación e Medio Ambiente, Isabel García Tejerina, e contou tamén coa presenza do presidente da Fundación Fórum Ambiental, Ramón Roca; e o director xeral de Ecoembes, Óscar Martín.
Outros galardóns
Non é o primeiro premio que recibe esta iniciativa ambiental. En decembro do 2016 tamén fio a gañadora do “Premio R de Ecoembes” na categoría de mellor campaña de sensibilización das administracións públicas. Tamén no 2016 recibiu un dos premios APROEMA Medio Ambiente 2016 e en 2017 foi recoñecido en Tallín como “Boa Práctica” en Desenvolvemento Urbano Sustentable no marco do festival do programa europeo URBACT
