Brión, 29 de novembro do 2017 – Por sexto ano consecutivo, o Concello de Brión pon en marcha a campaña especial de Nadal de Brión Solidario, para recoller alimentos para as familias máis vulnerables do municipio.
Brión Solidario é unha iniciativa que vén contando ao longo deste tempo co inestimable apoio da veciñanza, que mesmo intensifican a súa colaboración nestas datas especiais do Nadal, e que permitirá axudar a unhas trinta familias do municipio, é dicir, arredor dun cento de persoas.
Recuperando o lema “Así de fácil, así de responsable”, o Departamento de Servizos Sociais de Brión volve solicitar a colaboración da veciñanza, ben achegando alimentos non perecedoiros ben donativos en metálico. No caso das achegas de alimentos non perecedoiros e correctamente empaquetados, este ano precísanse especialmente produtos de Nadal, azucre, conservas e produtos de hixiene; sendo menos necesarios pero ben recibidos outros como aceite, leite, pasta ou galletas.
As achegas ao Brión Solidario poden entregarse ata o remate do Nadal nos distintos centros municipais (Casa do Concello, Casa da Cultura, Centro Social Polivalente e Biblioteca Municipal) ou no supermercado Froiz de Montebalado. Tamén se aceptan donativos económicos en metálico na Casa do Concello (Tesourería Municipal) e na oficina de Abanca de Montebalado.
O alcalde, José Luís García, agradece por adiantado a colaboración veciñal xa que “os veciños e veciñas de Brión fan gala da súa solidariedade doando alimentos ao longo de todo o ano, que se incrementa no Nadal coa colaboración tamén de agrupacións, asociacións e empresas que desenvolven accións de apoio a esta iniciativa”. Exemplos desa cooperación son a Piscina Municipal, a asociación cultural e deportiva O Esquío no Piñeiro, a Unión Deportiva Bastavales, a asociación de Mulleres Xuntanza, o supermercado Froiz de Montebalado, a asociación de veciños da parroquia de Ons ou os centros educativos de Brión, que aproveitan a celebración de eventos propios para recoller alimentos para “Brión solidario”.