Silleda, 7 de xuño do 2017 – O Concello de Silleda inicia hoxe o proceso para a implantación da Administración Electrónica coa colaboración da Deputación de Pontevedra dentro do plan previsto para concellos de menos de 40.000 habitantes.
Hoxe será presentada en Silleda a ferramenta Gestiona, da entidade Espúblico, coa que se impartirá a formación ao persoal municipal. Unha vez realizada esta presentación iniciarase o proceso para realizar consultarías por departamentos e proceder á formación dos funcionarios.
Esta nova forma de tramitación cambiará o sistema de traballo na entidade local, así coma o xeito de relacionarse cos usuarios, que con esta ferramenta poderán realizar unha serie de trámites dende dispositivos móbiles.
A Lei 39/2015, de 1 de outubro, do procedemento administrativo común das Administracións Públicas regula o dereito da cidadanía a relacionarse coas distintas Administracións públicas a través de medios telemáticos. O proxecto de Administración electrónica para os Concellos contempla a implantación, parametrización e posta en marcha dos módulos que forman parte deste servizo. Así, poñerase a disposición do persoal técnico de Silleda un sistema de xestión dixital de expedientes, así como unha sede electrónica para os cidadáns.
“A Administración electrónica é un paso necesario que agora damos na modernización do Concello, tamén coa axilización de trámites como un dos obxectivos”, indica o alcalde, Manuel Cuiña