Silleda, 12 de agosto do 2018 – O Concello de Silleda vén de asinar un novo convenio de cesión de terreos con particulares que permitirá o uso e humanización dun solar en Bandeira.
O terreo está situado na rúa da Feira, nas inmediacións da praza Juan José Salgueiro. O goberno municipal estudará nas vindeiras semanas os posibles usos deste terreo que grazas á cesión da propietaria poderá ser utilizado como espazo público. Precisamente o alcalde, Manuel Cuiña, agradecía a propietaria, Carmen Soto Lareo, a cesión “Pola súa situación será un terreo destacado para calquera uso que se decida darlle”.
A cesión terá, coma noutros casos asinados recentemente, unha duración indeterminada, ata que os propietarios do terreo decidan destinalo a outro uso, notificándollo previamente ao Concello de Silleda, que asumirá todos os gastos e traballos para o adecentamento do terreo.
Humanización da vila
A iniciativa neste caso partiu do Concello de Silleda, que á vista da situación da parcela, en desuso, e da necesidade de mellorar o seu acondicionamento, propuxo á familia propietaria asinar este convenio. Esta actuación vén a sumarse a outras realizadas nos últimos anos, tanto en Silleda coma na Bandeira, apostando pola mellora e humanización das vilas. “Cremos que se trata dun acordo que beneficiará á veciñanza e contribuirá a mellorar a imaxe do pobo da Bandeira”, apunta Cuíña, que lembra tamén a cesión doutro solar situado na rúa Xeral que se acondicionou hai dous anos como zona axardinada.
Tamén en Silleda acondicionáronse solares cedidos na rúa María Colmeiro e na rúa Cartaxena, que se adaptaron como aparcamentos públicos e nalgún caso como zona axardinada.