Silleda, 14 de febreiro do 2018 – O goberno de Silleda reuniuse cos propietarios dos terreos no que se atopan xacementos para acordar a posta en valor dos petróglifos.
A concelleira de Cultura e Turismo, Ana Luisa González, participará no encontro cos propietarios dos terreo onde se ubican algún dos xacementos arqueolóxicos da zona sur do municipio. O que se busca é poñer en valor cun proxecto de sinalización os petróglifos. O acordo final permitirá que o proxecto quede listo en marzo.
Os asistentes coñeceron polo miúdo o proxecto de sinalización promovido polo Concello de Silleda e realizado polo arqueólogo Israel Picón. Os propietarios que asistiron ao encontro (tan só faltou un) asinaron a autorización correspondente para a instalación dos paneis e amosaron o seu acordo coa iniciativa para a posta en valor destes elementos patrimoniais.
A concelleira de Cultura e Turismo, Ana Luísa González, xunto con técnicos do departamento e o arqueólogo autor do proxecto explicaron aos propietarios en que consiste a iniciativa e que será financiada cunha subvención de 9.250 euros.
Os traballos suporán a instalación de paneis informativos sobre o patrimonio histórico e cultural dos bens inmobles de interese municipal centrados nos xacementos e zonas arqueolóxicas das parroquias mais meridionais do concello de Silleda presididas pola Serra do Candán. Nesta zona atópanse máis de medio centenar de xacementos arqueolóxicos de diferente tipoloxía:poboados da idade do Ferro, petróglifos prehistóricos e históricos, enterramentos neolíticos….
De xeito xeral a sinaléctica estará redactada en tres idiomas, galego (principal), castelán e inglés. Ademais da instalación de paneis tamén está previsto colocar sinais turísticas direccionais de estradas. Nos paneis figurará información gráfica (fotografías, mapas explicativos…).
Roteiros e visitas de centros educativos
Una vez rematada a instalación está prevista a recuperación do roteiro nocturno que puxo en marcha a Asociación de Veciños San Miguel de Oleiros e outras visitas con escolares da contorna, para que os “nenos coñezan o amplo patrimonio arqueolóxico de Silleda, xa que é tan importante que nos visiten os de fora coma que os nosos veciños coñezan e aprecien o que temos aquí”, sinala Ana Luisa González.
