Silleda, 7 de marzo do 2019 – O Concello de Silleda converterase no primeiro municipio en asinar un convenio coa Fundación Banco Farmacéutico de Galicia o que lle permitirá axudar a veciños sen recursos ao acceso a fármacos.
A Fundación Banco Farmacéutico de Galicia naceu co obxectivo de dar resposta ás necesidades actuais de acceso aos medicamentos e tratamentos de persoas que non poden facerse cargo do copago. Conta ademais con outros ámbitos de actuación coma o financiamento de audífonos, tratamentos médicos de nenos e nenas con distintas discapacidades e enfermidades raras, ou o apoio á investigación contra o cancro, principalmente no estudo da biopsia líquida por parte de Oncomet.
A concelleira de Benestar Social, Pili Peón e a Educadora Social do Concello de Silleda, Sara Blanco, mantiveron un encontro cos vicepresidentes desta entidade, os silledenses Miguel Villar (presidente de Amigos de Galicia) e o farmacéutico Alfredo Garrido, así coma co seu director Jesús Busto, para establecer a futura colaboración proposta por esta fundación.
Segundo o convenio, que está previsto asinar o vindeiro 14 de marzo coa presidenta do Banco Farmacéutico de Galicia Noelia Romero, a fundación e o Concello de Silleda faranse cargo, ao 50%, do pago dos medicamentos dos veciños e veciñas de Silleda que non poidan facer fronte ao abono destes por cuestións económicas, sempre previo informe dos Servizos Sociais municipais. O financiamento de certos tratamentos ou a adquisición de audífonos, próteses ou outros elementos ortopédicos necesarios, serán algúns dos recursos financiables a través deste convenio.
Con esta actuación, o Concello de Silleda segue avanzando na procura da mellora dos servizos ás familias con menos recursos e tamén en ofrecer mellores prestacións aos veciños e veciñas de Silleda.