Silleda, 13 de agosto do 2018 – A Concellaría de Benestar Social do concello de Silleda ven de solicitar a Xunta de Galicia a concesión de máis horas do Servizo de Axuda no Fogar na modalidade de dependencia.
Según a concelleira Pilar Peón, Silleda ten na actualidade concedidas 2.557 horas de dependencia e desde xaneiro so se incorporaron dúas persoas máis o que resulta insuficiente xa que “Temos en lista de agarda a un total de 46 persas, dos que 10 están valorados cunha dependencia en grado III, aos que hai que sumar persoas que aínda non foron valoradas”.
O concello precisa 944 horas máis ao mes para que tódolos demandantes poidan acceder ao servizo “Todo isto deixa aos nosos maiores e dependentes así como aos seus coidadores/as sumidos nun alto nivel de desprotección, lonxe do que pretendía ser a Lei de Dependencia de 2014”, explica a concelleira.
A día de hoxe a poboación do municipio maior de 65 anos supón arredor do 29% do total de habitantes de Silleda “Agardamos que a Xunta de Galicia, que vén de anunciar un aumento do gasto para atender aos nosos dependentes, teña en conta esta solicitude para que poidamos prestar un servizo básico para a cidadanía”, engade.