Compostela, 25 de febreiro do 2021 – O Partido Popular pedirá explicacións pola situación contractual das marquesiñas con publicidade e muppis situados en Santiago.
O uso das marquesiñas, muppis e transporte público como soporte publicitario forma parte dun contrato que extinguiuse no mes de maio do ano 2009. O popular Ramón Quiroga leva ao pleno que se celebra hoxe unha petición de explicacións sobre a situación en que se atopa está cuestión.
Confirmación en xaneiro do 2020
Hai un ano, en xaneiro do 2020, a Xunta de Goberno local aprobou declarar formalmente a extinción da relación contractual formalizada coa empresa Clear Channel SLU con efectos de maio de 2009 e, na súa virtude, declarar a inexistencia de título válido que lexitime a ocupación de dominio público con marquesiñas urbanas e muppis por parte da citada empresa.
No acordo tomábase en consideración a proposta da empresa de facer entrega ao Concello dos referidos bens, cesión que foi aceptada sen que procedera o pagamento de ningunha cantidade. A motivación do acordo amparábase en razóns de interese público, ao considerar que eses elementos continuarían a ser utilizadas polos usuarios do transporte ata o momento en que o Concello outorgara unha nova autorización ou concesión sobre o dominio público “que, en atención á tramitación que implica, non se producirá antes de seis meses”.
Transcorrido máis de un ano do acordo do Goberno e máis dos seis meses sinalados para unha posible nova autorización ou concesión sobre o dominio público, Ramón Quiroga sinala que “a realidade é que neste momento non se coñece que se tivera licitado o novo contrato nin como se está a xestionar a publicidade incorporada nas marquesiñas urbanas e nos muppis que se estenden polo termo municipal”, polo que considera que o Grupo de goberno ten que explicar cal é a situación actual destes elementos vinculados ao transporte público urbano de viaxeiros.
