Compostela, 3 de outubro do 2018 – Hoxe mércores 3 de outubro, a actividade de Curtocircuíto comezará ás 10h00 co obradoiro Caligrafías sonoras, impartido por Amanda Villavieja, sonidista de cinema documental e de ficción.
As actividades para centros de ensino continuarán coas proxeccións de Criaturas e Teenage Riot, que reunirán arredor de 400 alumnos e alumnas procedentes de centros de toda Galicia. A formación para os máis novos continuará con Canteiras, unha actividade integrada na programación do festival co obxectivo de poñer en valor iniciativas de educación para o cine dentro da nosa comunidade e dos centros educativos de toda Galicia á que asistirán uns 90 estudantes.
Xa pola tarde, o Teatro Principal acollerá de novo as proxeccións dos filmes da nosa Sección Oficial: Explora e Radar. A primeira será ás 18h30, na que estarán presentes os cineastas Helga Fanderl -Konfiguration schwarz und weiss (Configuration in Black and White)- e Eginhartz Kanter -Taking away- para presentar os seus traballos ante o público. Radar, pola súa banda, será ás 20h15, e contaremos coa presenza de Paola Buentempo -Las fuerzas- e Alberto Martín Menacho -Mi amado, las montañas-.
Este mércores será tamén o día de inaugurar unha das novas seccións do festival: Terra, adicada a autores e autoras galegos que contan xa cun universo creativo consolidado ao longo de diferentes obras. Esta primeira sesión estará protagonizada por Xacio Baño e acollerá ás 20h00 en Númax unha escolma dos seus filmes. Nesta mesma sede ás 22h00 tamén terá lugar a primeira sesión da sección Penínsulas, adicada ás películas españolas da tempada, na que estarán presentes os cineastas Guillermo Benet -Los inocentes-, Luis López Carrasco -Aliens- e Laura Ferrés -Los desheredados-.
Ás 20h30 no Museo das Peregrinacións terá lugar a Carta Branca a Ezequiel Méndez Vidal, organizada en colaboración co actual Cineclube de Compostela, fundado en 2001 e herdeiro en certa maneira da iniciativa de Méndez e os seus coetáneos. Ademais, o cineasta Bertrand Mandico e a actriz Elina Löwensohn volverán estar presentes na proxección das películas Le Cavalier Bleu, Il dit qu’il est mort, Life and death of Henry Darger, Boro in the Box e Depressive Cop, pertencentes á retrospectiva que o festival lle adica ao director francés.
Para rematar a xornada, Curtocircuito adica unha edición máis as súas noites á música. Nesta ocasión será a a quenda do synth pop multidimensional dos innovadores Sunset Rollercaster, que ofrecerán a partir das 23h30 un concerto na sala Sónar.