Compostela, 19 de agosto do 2018 – O Feito a Man acolle hoxe o concerto dos norteamericanos The Blue Ribbon Healers, a partir das nove na Praza dos Gatos.
O Feito a Man baixa a intensidade e hoxe domingo ofrece un único concerto que, iso si, non deixará indiferente a ninguén. The Blue Ribbon Healers son unha banda americana que interpreta temas de jazz antigo, melodías balcánicas, animado swing de New Orleans e Luisiana. Con máis de 1.000 concertos en varios países diferentes, este trío está constantemente a reelaborar o folk americano, o swing e a música balcánica. Ademais, Scott Stobe coa súa guitarra resoadora, contribúe a esa enerxía máxica e contaxiosa que sempre se apodera do público nos seus concertos.
O grupo fórmano Rob Pate á guitarra e voz, Cindy Rose na mandolina e voz, e Scott Stobe na guitarra resoadora.
Feito a Man 2018
Polo Feito a Man deste ano están a pasar case 60 propostas artísticas de diferentes e diversos estilos musicais: pop, rock, blues, jazz, hip hop, música tradicional galega… Como vén sendo habitual, o groso do festival recae nos concertos de pequeno formato realizados nas terrazas dos establecementos organizadores, mais tamén hai lugar para noites con artistas de maior formato. Así, á parte de rúas como a Vía Sacra, a rúa da Orfas, a Praza de Feixóo, Tras San Fiz de Solovio ou rúa Xelmírez; tamén haberá actuacións nas prazas de Mazarelos, San Martiño Pinario ou Cervantes.