Touro, 7 de outubro do 2020 – A Marea Veciñal de Touro denuncia que o concello repartiu entre a veciñanza xel hidroalcólico que non garante a desinfección.
Según o comunicado da Marea o produto adquirido polo concello de Touro, e distribuído porta a porta polas concelleiras e concelleiros do PP local e algúns exconcelleiros do mesmo partido, non garante a desinfección de mans con eficacia viricida.
Aseguran que, en todo caso, trataríase dun produto de limpeza ou hixiene, pero non un produto de desinfección. O xel en cuestión non esta recollido no listado de antisépticos de pel sa con eficacia viricida pola Axencia Española de Medicamentos e Produtos Sanitarios (AEMPS), o organismo competente no proceso de avaliación para o seu rexistro, autorización e comercialización.
Tampouco na etiquetaxe do mesmo constan as propiedades desinfectantes ou eficacia viricida conforme a normativa de aplicación (Norma UNE-EN 14476:2014+A1:2015: Antisépticos e desinfectantes químicos); nin sequera se garante a concentración mínima de alcol que recomenda a Organización Colexial de Enfermería.
A Marea Veciñal de Touro insiste en que estes feitos poden supoñer un risco para a veciñanza fronte ao COVID ao crear un falsa sensación de seguridade e protección que en ningún caso garante o produto. Deste xeito, o grupo insta ao Alcalde a que de modo urxente informe á veciñanza porta a porta, do mesmo xeito que fixeron o reparto do produto, de que o uso deste produto non sexa en ningún caso substitutivo da desinfección das mans.