Touro, 17 de xullo do 2019 – A Marea Veciñal de Touro ven de emitir un comunicado no que din que as actividades de lecer do Xullo Lúdico, que organiza o concello, incumpren a normativa no que respecta aos monitores.
O Xullo Lúdico é un campamento, para cativos de 6 a 13 anos, que se desenvolve este mes e a primeira quincena de agosto. A Marea explica que o decreto 50/2000, polo que se actualiza a normativa en materia de Xuventude, obriga a que as actividades conten cun mínimo dun técnico dirixente por cada 10 alumnos/as. A pesares de que o concello publicou na súa páxina web e nos medios de comunicación unha inscrición de 60 cativos, a licitación do servizo establece a contratación de tan só 4 monitores/as “o cal incumpre a normativa existente e demostra a escasa preocupación do rexedor Ignacio Codesido pola calidade dos servizos educativos que se ofertan”.
Para o grupo político o concello está primando a oferta económica e favorecendo a precarización do persoal contratado ó mesmo tempo que se sobe o soldo até os 43.000€ (máximo legal permitido). A marea veciñal insta ó goberno local a que actúe según a legalidade, xa que se está poñendo en perigo a seguridade dos nenos/as e mesmo lle podería traer consecuencias legais.
O principal grupo da oposición tamén apunta que o campamento non sirve para conciliar a vida familiar e laboral como anuncia o concello, xa que os horarios (10-13:30) non se adaptan á realidade das familias.